Shyǵys Qazaqstan oblysynyń ákimi Danıal Ahmetov toqsanynshy jyldary aýdandyq mártebeden aıyrylǵan eldi mekenderdiń ahýaly jaıly baıan etti, dep habarlaıdy QazAqparat tilshisi.
«Marqakól men basqa aýdandardy qaıta qurý máselesi týraly aıtyp bereıin. Maǵan ondaı ótinishpen azamattar keldi. 45 adammen kezdesip, jaqsy suraqtar qoıyldy. Olardan: «Aıtyńdarshy, qaısylaryńyz Kúrshim men Marqakólde turasyzdar?», - dep suradym. Sóıtsem, 45 adamnyń bireýi ǵana sol jaqtan kelgen eken. Bári de 20 jyldan beri Óskemen men Semeıde turatyn bolyp shyqty. Biraq, óte durys másele kóterilip, arnaıy komıssııa quryldy. Qazir bes aýdanda jumys júrgizip jatyrmyz. Olar: Úrjar, Tarbaǵataı, Zaısan, Katonqaraı jáne Kúrshim aýdandary. Sol aýdandardy arnaıy baǵdarlamamen qamtyp, qosymsha qarjy bólemiz», - dedi Danıal Ahmetov búgin Ortalyq kommýnıkaııalar qyzmetinde ótken baspasóz máslıhatynda.
Aımaq basshysy óńirde «jańadan birde-bir aýdan ashylmaıtynyn» málimdedi.
«Nege deseńiz, ol aýdandardy ashyp alsaq, jumys oryndaryn quryp, halyqty tartý úshin 9 mlrd teńge kerek bolady. Halyqqa jańa sheneýnikter kerek pe? Onyń ornyna sol aldyma kelgen adamdarmen kelistim. Olar da maquldady. Bizge arnaıy baǵdarlama kerek. Sony iske asyramyz», - dedi oblys ákimi.
«Adyrna» portaly
