Týrızm salasyn damytýda jan-jaqty jobalar júzege asyp jatqan Túrkistan Túrki áleminiń astanasy retinde álemdik arenada Qazaqstannyń bedelin bıiktete berýi tıis dep habarlaıdy «Adyrna» ulttyq portaly Túrkistan oblystyq baspasóz qyzmetine silteme jasap.
IýNESKO-nyń qorǵalý aımaǵyndaǵy ǵımarattar Qoja Ahmet Iasaýı kesenesiniń bıiktiginen aspaıdy. Jáne barlyq jerde mavzoleı kórinip turýy qajet. Bul aýmaqtaǵy ǵımarattar men baspanalar ortaazııalyq úlgide salynýda. Qazaqy naqyshta, oıý-órnekter qoldanylady. Oblys ákimi Ómirzaq Shókeev kezekti ret shahardaǵy qurylys jumystarynyń barysyn baqylady. Óńir basshysynyń qatań qadaǵalaýymen júrgizilip jatqan mádenı -rýhanı ortalyqtaǵy halyqaralyq deńgeıdegi nysandar álem týrısterin qyzyqtyratyn ári tarıhtan syr shertetin ǵajap ortalyqqa aınalýda.
Túrkistan qalasynda shaharǵa erekshe kórik beretin aýqymdy jobalardyń qurylysy jalǵasýda. Solardyń biri de biregeıi – «Kerýen-saraı» kesheni.
Jospar boıynsha bul keshen kóne zamannyń ejelgi saýda alańdaryn eske túsiretin úlken shyǵys úlgisindegi grand-bazarǵa aınalady. «Kerýen-saraı» aýmaǵynda qonaqúıler, kınoteatrlar, meıramhanalar, tarıhı-saýda kóshesi men jasandy kólmen qatar, keshenge jaqyn jerde «Kerýen Saraı» turǵyn úı kesheni ornalasady. Turǵyn úı kesheniniń kórinisi negizgi keshen men kóne qala ortalyǵynyń jalpy kelbetine sáıkes, ejelgi qalanyń rýhyn, qaıtalanbas úlgisi men biregeı sáýletin saqtaıdy.
Sondaı-aq Túrkistan qalasynyń mádenı-rýhanı ortalyǵynda zamanaýı baspanalar boı kóterdi. Kóne shahardyń eń kórikti jerinde ornalasqan «Keruen Sarai» turǵyn úı kesheninen páter men taýnhaýs satyp alýǵa bolady. Shyǵystyń ásem kelbeti men ejelgi shahardyń biregeı beınesi saqtalǵan keshen Iasaýı kesenesine jaqyn jerde ornalasqan. Turǵyn úı kesheni eki jáne úsh qabatty 9 keshennen turady. 1, 2 jáne 3 bólmeli páterler men taýnhaýstardan turatyn 125 turǵyn úı jaıǵasqan.
Túrkistanyń jańa kórikti aýmaǵyndaǵy qurylys barysyn oblys ákimi Ómirzaq Shókeev aralap kórdi. Qurylysshylarmen kezdesken óńir basshysy jaýapty tulǵalarǵa demalys oryndaryndaǵy balalar alańqaılarynyń sapasy men qaýipsizdigin jiti qadaǵalaýdy júktedi.
