Salafızmniń saldarynan týǵan qyzynan tirideı aıyrylǵan óskemendik anamen kezdestik. Aıtýynsha salafızm aǵymyn ustanatyn er adam qyzynyń aýyr kúızelistik jaǵdaıda júrgen sátin paıdalanyp, oǵan ınternetpen teris dindi ýaǵyzdaý arqyly kúıeýge shyǵýǵa kóndirip, úıine kirgizip alǵan. Qazir qyzymen baılanysy múldem úzilgen. Kúıeýi anasymen kezdesýine qatań tyıym salǵan.
-Bizge bastap baıandap berińizshi. Qyzyńyz qandaı edi?
Anasy: Qyzym aqyldy, jaınap turǵan qyz edi ǵoı. Kolledjin oqyttym, jıhaz dúkeninde satýshy bolyp jumys istep júrgen. Meni tyńdaıtyn, sińilisine qamqor, únemi janymda bolatyn... Oǵash minezin kórgen joqpyn.
-Qyzyńyzdyń dinge qyzyǵýshylyǵy qalaı bastaldy?
Anasy: Ol qatty aýyryp júrdi. Qant dıabeti aýrýyna shaldyǵyp, eki búıregi jumys istemeı, dıalızde júrdi. Mama, men ólemin ǵoı,-dep ólimnen qatty qoryqty. Dárigerler de maǵan solaı aıtqan bolatyn. Qudaı týraly, o dúnıe týraly jıi oılana bastady. Sodan bir kúni uzyn kıinip, basyna ádemi oramal salyp, namaz oqyp úırenemin dep meshitke ketti. Júregim qatty aýyrdy. Qaıtedi endi, bir aıaǵy kórde, bir aıaǵy jerde tur ǵoı. Namaz oqysa oqysyn, kóńili jubanyp kúızelisinen arylar dep oıladym... arty bulaı bolaryn bildim be.....
-Sonda dindi meshitten úırendi me?
Anasy: Joq, ol meshitke sol joly ǵana bardy. Odan keıin dindi ınternetten oqyp úırenip júrdi. Onyń neni oqyp júrgenine mán bermedim. Sóıtsem qazirgi teris dindegi kúıeýimen de sol ınternet arqyly tanysypty.
-Qyzyńyzdyń teris dinı aǵymda ekenin qalaı bildińiz?
Anasy: Úıden shyǵyp ketip úsh kún joǵaldy. Maǵan qońyraý shalyp óziniń kúıeýge tıgenin, sharıǵat zańy boıynsha úsh kún kúıeýiniń qasynda qalatynyn aıtty. Men shoshyp kettim: «kúıeýge shyqqanyń qalaı, eki búıregiń jumys istemeı turǵanda kúıeýi nesi»,- dep aıqaıladym...Qyzym keshke kelip, bárin túsindiretinin aıtty. Keshke úıge keldi. Esikti ashsam basynan aıaǵyna deıin qap-qara bolyp kıingen, betine de maska kıip alypty. Men sol jerde esimnen tandym..... Esimdi jısam basymdy súıep, qyzym betime sý búrkip otyr eken. «Andaǵy kıimińdi shesh, joǵal kózime kórinbeı, qara kıimińdi sheshpeseń úıge kirme»,- dep aıqaıladym... Bar oıym, qyzyma solaı aıtsam, qaıtadan óz kıimin kıip qaıtyp keler dep oılaǵanmyn ǵoı..... Qaıdam, óz qyzym azǵana ýaqyttyń ishinde qatty ózgeripti. Álgi kúıeýimen telefonmen sóılesti de, úıden shyǵyp ketip qaldy. Qaıtyp oralmady.
-Densaýlyǵy ne boldy?
Anasy: Arada bir apta ótkende qyzym denesi isinip, reanımaııa bólimine alyp bara jatqanyn habarlady. Janushyryp aýrýhanaǵa bardym. Barsam sol qara kıimderi shashylyp dálizde qalypty. Kıimderinen jaǵymsyz ıis shyǵyp turdy. Alladan qyzymnyń amandyǵyn tilep úsh kún aýrýhananyń esigin kúzettim. Dárigerler janyn aman alyp qalyp, búırek aýystyrý kerektigin aıtty. Astana qalasyndaǵy ǵylymı ortalyqqa habarlasyp ota jasaýǵa kelistik. Ózimniń bir búıregimdi beretin boldym. Qyzyma qara kıimderińdi Astanaǵa kıip barmashy dep ótindim. Ol meni hıdjap kımesem operaııaǵa barmaı, osynda qalyp ólemin dep qorqytty. Ne kerek, onyń aıtqandaryna eriksiz kóndim. Ne kıse de tiri júrse eken dep tileıdi ekensiń. Operaııa aıaqtalyp, ekeýmiz qatar eki tósekte jattyq... Sonda qyzym maǵan aıtty: Mama, sen bilesiń be meniń dinim eń taza din. Eger soǵys bolsa, namaz oqymaıtyn anańdy da, aǵańdy da satyp ketetin din,-dedi. Men odan: «Eger Alla kúıeýiń men anańnyń janyn qaısysyn birinshi alaıyn dep surasa, ne deısiń,-dep suradym. Sonda qyzym shimirikpesten: Árıne seniń janyńdy birinshi al dep aıtar edim,-dedi.... Dál sol sátte men odan syrt aınaldym. Júregim qatty aýyryp, kóńilim ábden qaldy.. «Ata-babamyzda bulaısha qara jamylý bolmaǵan. Saǵan qara jamyldyrǵan kúıeýiń, seni menen aıyrǵan myna kúıeýiń sespeı qatsyn»,- dep qarǵadym. Ol sol sátte: sen bizdi qarǵadyń,-dep uzaq jylady- Maǵan bul búırekti sen bergen joqsyń, buny maǵan sen arqyly Allah berip tur»- dedi. Menińshe olardyń Alla taǵalasy múldem basqa... túsiný qıyn olardy...
-Negizgi kıkiljińge sebep tek osy qara kıim ǵana ma? Basqa sebep joq pa?
Anasy: Árıne teris din. «Sen namaz oqymaısyń, senimen aralasýǵa bolmaıdy»,- deıdi maǵan. Men oǵan eki ret ómir syıladym ǵoı. Ómir syıladym dep turǵan joqpyn, tipti qajet bolsa eki búıregimdi birdeı berýge daıynmyn. Men anasymyn ǵoı. Teris dinge kirgizgen anaý kúıeýin jek kórdim. Aýrý qyzymnyń ondaı teris dindi ustanýshy, buryn sottalǵan adamǵa kúıeýge shyǵýyna múldem qarsy boldym. Maǵan bazardan et satyp ákelip haram tamaq jep otyrsyń dep menimen birge bir dastarhanda otyryp tamaq ishýden bas tartty. Namaz oqymaǵan adam soıǵan maldyń eti haram dedi...Namaz oqymaıtyn adammen aralasý kúná bolady dedi...televızor kórme, mýzyka tyńdama... ne degen din bul sonda?
-Kúıeý balańyzben til tabysyp, olardy da túsinip kórýge tyryspadyńyz ba?
Anasy: Tyrystym. Qyzyma renjisem de ony bir kórý úshin bárine daıyn boldym. Shemonaıha qalasyna qyzymdy izdep turyp jatqan úılerine 2-3 ret bardym. Aýlasyn bıik etip qorshap tastaǵan. Qaqpanyń esigin ashpaı qoıdy. «Qyzym, meni keshirińdershi, men senderdi jaqsy kóremin. Seni tym bolmasa anda-sanda bir kórip turaıynshy. Kúıeýińdi ertip týǵan úıińe kelip turshy,- dep aıqaılap jalyndym. Qyzym esiktiń arǵy jaǵynan: mama, sen endi bul úıge kelme, qyzyń joq, meni ólip qalǵan dep oıla,-dep sybyrlady. Sol kezde janynda turǵan kúıeýi: qyzyńnyń ne degenin estidiń ǵoı, endi kelseń óltirip tastaımyn,-dedi. Salafıt kúıeýi meni qyzymmen kezdestirmeýge tyrysady. Sóılesip qalsa sheshesine degen mahabbaty oıanyp, ony tastap kete me dep qorqady. Sol úshin ony azǵyryp, maǵan kúshpen qarsy qoıyp ustap otyr. Mıyn ábden ýlap tastaǵan. Men úshinshi ret barǵanda týǵan qyzym kúıeýiniń aıtýymen polıııaǵa maǵan qarsy aryz jazdy. Bul netken sumdyq? Sonda qyzyma bul dinniń durys emes ekendigin aıtyp, oǵan eshkim kómektese almaı ma?
-Eger qyzyńyz sizdiń osy suqbatyńyzdy kóretin bolsa, oǵan ne aıtar edińiz?
-Oǵan teris dinı aǵymnan qaıtyp, densaýlyǵyńdy kútip, týys-týǵanyńmen aralasyp, durys ómir súr dep aıtar edim.. Seni saǵyndyq...sińiliń seni saǵynyp ylǵı da jylaıdy..
Baıǵus ananyń budan ary sóılesýge júregi shydamady. Janary jasqa shylaǵan áıel bizben únsiz qoshtasyp kete bardy.
sýret ashyq ınternet kózinen alyndy
Suqbatty júrgizgen
ShQO Din máselelerin zertteý ortalyǵynyń mamany E.Kurmanǵalıev,
"Adyrna" ulttyq portaly
