Quraq qurap, kórpe tigetin, urshyq ıirip, toqyma, sháli toqıtyn áıel-analar aramyzda barshylyq. Al biz áńgimelegi otyrǵan Kúlán Sháýdirbaeva joldasynan erte aıyrylyp, ómirdiń qıyndyǵyn kóp kórse de jalǵyz qolymen eńbek etip, is tigip, balalaryna jetimdik taýqymetin tartqyzbaı júrgen jan.
Aqtóbeniń Baıǵanın aýdanynda turatyn Kúlán Sháýdirbaevany aýyldastary maqtan etedi. 1986 jyly joldasy baqılyq bolǵanda balalaryn jetildirem dep júrip, ózi oń qolynan aıyrylypty. Otbasyndaǵy bar tirlik bir ózine qarap turǵan soń, ol taǵdyr synyna moıymaı jalǵyz qolymen eńbek etip, tigin tigip, quraq qurap, oıý oıady. Ómir qyńyr minez tanytyp, súrindirse qaıta turyp, jylatsa jubanǵan keıipkerimiz búginde aıaýly ana, asyl áje atanyp otyr.
Kúlán apa tiginshilik ónerdi alǵash ájesinen úırenipti. Keıin anasy da qyzyn osy iske beıimdese kerek. Qazir Kúlán apa 88 jastaǵy anasy ekeýiniń basy qosylsa, tiginshilik týrasynda, qolóner jaıynda syr shertisedi eken. Keıipkerimizdiń anasy Arý áli kúnge toqyma toqyp, izinen ergen nemere-shóberelerine is tigýdi úıretetin kórinedi.
– Men aýdandyq balabaqshada uzaq jyl eńbek ettim. Balalarym oń-solyn endi tanı bastaǵan kezde joldasym ómirden ozdy. Jyldyq sadaqasyn berer kezde azyq-túlik alý úshin oblys ortalyǵyndaǵy bazarǵa barǵanmyn. Ol kezde aýyldyń dúkenderinde qazirgideı molshylyq joq edi. Tún ishinde temirjol stansasynda úsh poıyz qatar turdy. Júk sómkemdi arqalap, sol poıyzdardyń astynan ótemin dep asyǵyp kele jatqanda úlgere almaı qaldym… Aýrýhanada esimdi jıǵanda oń qolymnyń joq ekenin kórdim. Balalarymdy qalaı ósiremin, endigi turmysym qalaı bolady dep qatty qınaldym alǵashynda. Tipti, on eki múshemniń birin alǵansha, nege birden ózimdi óltirip tastamady dep haq Taǵalaǵa til tıgizdim. «Adam úsh kúnnen soń kórge de úırenedi» degen emes pe? Ras, áýelgide sol qolymmen eńbek etpek túgili, tamaq ishe almadym. Shúkir, keıin qıyndyqtardyń bárin jeńip, jalǵyz qolmen de ómir tirshiligine beıimdeldim, – deıdi Kúlán apa.
Qıyndyq qursaýyna shyrmalǵan shaqta Kúlán apaǵa týystary qoldaý kórsetipti. Keıin balalary úı tirligine úırenip, qolǵabys tanytqan. «Qolymnan aıyrylǵan kezde endi is tige almaıtyn shyǵarmyn – dep qınaldym. Biraq janyń qalaǵan isti qalaıda jasaýǵa talpynady ekensiń. Eki jyldan soń anam aıaq tigin mashınasyn alyp berdi. Sol jaq qolymmen kıim piship, quraq quraýdy, keste tigýdi qaıta jalǵastyrdym. Balalaryma, týystaryma áli kúnge kıim tigip, qajetti dúnıelerin jańartyp beremin», – deıdi keıipkerimiz.
– Kúlán apa qonaqjaı adam. Úıine ár kez qonaq kelgendi jaqsy kóredi. Ózi jalǵyz qolymen as daıyndap, baýyrsaq pisirip, túrli dámdi taǵamdar ázirleıdi. Eger tiginshilik keıipkerimizge ájesinen daryǵan desek, onda Kúlán ananyń osy qasıetin otbasynda qazir nemeresi Áıgerim jalǵastyryp keledi. Kúlán ájesi is tige bastaǵan kezde Áıgerim janyna kelip, kómektesedi eken. «Ana kórgen ton pisher…» degenimiz osy emes pe?!
Aıgúl BÁITIBIQYZY,
Aqtóbe,
«Jas qazaq».
