4 mausym künı Batys Qazaqstan oblysy, Syrym audanyna qarasty Jympity auylynda ört şyqty. Saldarynan bır üidıŋ bes balasy qaza tapty, dep habarlaidy "Adyrna" ūlttyq portaly.
2019, 2020, 2021, 2023 jäne 2024 jyldary tuǧan bes bala köz jūmdy.
Tötenşe jaǧdailar departamentınıŋ mälımetınşe, ört turaly habar saǧat 15:00 şamasynda tüsken. Bes minuttan keiın qūtqaruşylar oqiǧa ornyna jetken.
«Osy uaqytta Saǧyrbaev köşesındegı jeke tūrǧyn üide 30 şarşy metr aumaqta jeke zattar men jihazdar janyp jatqan. Qūtqaruşylar bes balany es-tüssız küide üiden alyp şyqty», – delıngen TJD habarlamasynda.
Balalar audandyq auruhanaǧa jetkızılgenmen, ökınışke qarai, köz jūmǧan.
Aldyn ala mälımet boiynşa, olardyŋ ölımıne iıs tiiu, kömırqyşqyl gazynan ulanu sebep bolǧan. Audan äkımdıgınıŋ habarlauynşa, otbasy üidı jalǧa alyp tūrǧan. Ört kezınde anasy auyl dükenınde jūmys ıstep jürgen, al äkesı de üide bolmaǧan.
Qazırgı taŋda balalardyŋ ölımıne bailanysty polisiia qylmystyq ıs qozǧady.
