Germaniianyŋ Veimar qalasynda ornalasqan Buhenvald konslagerınde qazaqstandyq tūtqyndarǧa arnalǧan eskertkış taqta ornatyldy, dep habarlaidy "Adyrna" ūlttyq portaly.
Bastamany jeke qarajaty esebınen tarihşy, tarih ǧylymdarynyŋ kandidaty, QR Joǧarǧy Soty Kommunikasiialar bölımınıŋ meŋgeruşısı Perizat Säduaqas jüzege asyrdy.
Joba Ūly Otan soǧysy jyldary nasistık rejimnıŋ tūtqynyna tüsken qazaqstandyqtardy eske alu maqsatynda qolǧa alynǧan. Eskertkış taqta Buhenvaldtyŋ būrynǧy krematorii ǧimaratyna – lagerdegı eŋ qasırettı oryndardyŋ bırıne ornatyldy.
Atalǧan taqtada alǧaş ret QR-kod qoldanylyp, keluşılerge qazaqstandyq tūtqyndardyŋ tızımın qazaq, orys jäne nemıs tılderınde köruge mümkındık berıldı. Tızımge Almaty, Aqtöbe, Taraz, Şymkent, Pavlodar, Petropavl, Semei qalalary men Aqmola jäne Türkıstan oblystarynan şyqqan türlı ūlt ökılderı – barlyǧy 35 qazaqstandyq engızılgen. Eŋ jas tūtqyn 1926 jyly, al eŋ ülkenı 1900 jyly düniege kelgen. Tızımdı tolyqtyru jūmystary Buhenvald memorialdy keşenınıŋ qoldauymen jalǧasa bermek.
Buhenvald basşylyǧy qazaqstandyq tūtqyndardyŋ tızımın anyqtau bastamasy Perizat Säduaqasqa tiesılı ekenın rastaityn resmi sertifikat tabystady. Būl qūjat avtorlyq qūqyqtyŋ balamasy retınde qarastyrylady.
Eskertkış taqtanyŋ aşylu räsımıne Qazaqstan Respublikasynyŋ Germaniiadaǧy Elşılıgı men Frankfurttaǧy Bas konsuldyqtyŋ ökılderı, Buhenvald memorialdy keşenınıŋ basşylyǧy, Qazaqstan studentterı jäne joba bastamaşysynyŋ äpkesı Bekzat Ermekbaeva qatysty.
Perizat Säduaqas eskertkış taqta jeke bastamanyŋ nätijesı bolǧanymen, onyŋ Buhenvald tūtqyndarynyŋ ūrpaqtary men Qazaqstan halqynyŋ atynan ornatylǧanyn atap öttı. Joba gumanistık ärı beibıt sipatqa ie bolyp, tarihi jadty saqtau, totalitarlyq rejim qūrbandaryna qatysty ädılettılıktı qalpyna keltıru jäne halyqaralyq dialogty nyǧaituǧa baǧyttalǧan.
Bastamaşy Qazaqstan Respublikasynyŋ Syrtqy ıster ministrlıgıne, Germaniiadaǧy Qazaqstan Respublikasynyŋ Elşılıgıne, Frankfurttaǧy Bas konsuldyqqa, Buhenvald memorialdy keşenınıŋ basşylyǧyna jäne «ALJİR» memorialdy muzei keşenınıŋ negızın qalauşy Raisa Ramazanqyzyna körsetken qoldauy üşın alǧys bıldırdı.
Tarihtyŋ qasırettı betterındegı qūrbandarǧa taǧzym jasau jas ūrpaqty tarihi şyndyqty saqtauǧa jäne beibıtşılıktı nyǧaituǧa ündeidı.
