Türkıstan oblysy Arys qalasynyŋ 11-synyp oquşysy Aisūltan Altynbek älemnıŋ 86 joǧary oqu ornynan şaqyrtu aldy, dep habarlaidy "Adyrna" ūlttyq portaly.
Oquşyny AQŞ, Germaniia, Ūlybritaniia, Malaiziia jäne İspaniia elderınıŋ bedeldı universitetterı studentı retınde körgısı keledı.
Aisūltan şetelde bılım aludy köpten armandaǧan. Sol maqsatta bar bos uaqytyn oqu men özın-özı damytuǧa arnap, mol tabysqa qol jetkızgen. Onyŋ aituynşa, eŋ köp ūsynys AQŞ universitetterınen kelıp tüsken. Qazır ol ūsynystardy mūqiiat saralap, şeşım qabyldauǧa daiyndalyp jatyr. İtaliia men Malaiziia universitetterı de negızgı ümıtkerler qatarynda.
Aisūltanǧa berılgen bılım granttary tek oqu aqysyn ǧana emes, sonymen qatar tūru, tamaqtanu jäne elektrondy qūrylǧylardy paidalanuǧa ketetın şyǧyndardy da qamtidy.
Üş tıldı — aǧylşyn, türık jäne nemıs tılın erkın meŋgergen Aisūltan bolaşaqta IT salasynda jūmys ısteudı közdeidı. Onyŋ armany — kompiuterlık oiyndar äzırleu jäne qazaqstandyq jastarǧa şeteldık universitetterge tüsu mümkındıkterın baǧalauǧa kömektesetın arnaiy sait jasau.
«Būl sait arqyly oquşylar daiyndyq deŋgeiın tekserıp, naqty talaptarǧa qanşalyqty sai keletının bıle alady. Köptegen universitetter ırıkteu synaqtary üşın aqy alady. Menıŋ jobam jastardy artyq şyǧynnan qūtqaruǧa kömektesedı», – deidı Aisultan.Aisūltan oqityn mekteptıŋ taǧy toǧyz oquşysy da şeteldık oqu oryndarynan şaqyrtu alǧan. Mektep basşylyǧy būl jetıstıkterdı oquşylardyŋ talpynysy men qosymşa bılım beru üiırmelerınıŋ nätijesı dep baǧalaidy.
«Bız är oquşyǧa jeke jospar qūryp, synyp jetekşılerımen bırlese jūmys ısteimız. Sabaqtan keiın ötkızıletın qosymşa sabaqtar oquşylardyŋ dünietanymyn keŋeituge kömektesedı», – deidı mektep direktorynyŋ orynbasary Esjan Omarhanov.
Ūqsas jaŋalyqtar
