Memleket basşysy Qasym-Jomart Toqaev Jasandy intellektını damytu jönındegı keŋestıŋ alǧaşqy otyrysyn ötkızdı, dep habarlaidy «Adyrna» tılşısı Aqordaǧa sılteme jasap.
Prezident jasandy intellektını damytpai, jahandyq bäsekege tötep beru mümkın emestıgın eske saldy. Sifrlyq jüieler men jasandy intellekt egemen el boludyŋ kepılıne, ekonomikalyq damudyŋ qozǧauşy küşıne ainaldy.
«Sondyqtan bız de osy ahualǧa sai aldymyzǧa biık maqsat qoidyq. Qazaqstan üş jyl ışınde tolyqqandy sifrlyq el boluy kerek. Men būl turaly halyqqa Joldauymda jan-jaqty tarqatyp aittym. Jalpy, elımızde osy baǧytta bıraz jūmys ısteldı. Memleket tarapynan körsetıletın qyzmettıŋ 92 paiyzdan astamy onlain formatta ūsynylady. Byltyr elımızdegı qolma-qol aqşasyz tölemnıŋ ülesı 85 paiyzdan asty. Sondai-aq biyl alǧaşqy jarty jyl ışınde Qazaqstan azamattaryna 26 million sifrlyq qyzmet körsetıldı. Sonyŋ jartysyna juyǧy smartfon arqyly jasalǧan. Mūnyŋ bärı de, ärine, jaqsy. Deitūrǧanmen jasandy intellektınıŋ damu jyldamdyǧy öte tez, qarqyny joǧary. Sondyqtan bır orynda toqtap qalmai, būl ıske ünemı jaŋa közqaraspen qarau qajet»,–dedı ol.
Sondai-aq Qasym-Jomart Toqaev jasandy intellekt salasyna mamandanǧan zertteu universitetın aşudy tapsyrdy.
«Oqu ornyna arnaiy märtebe bergen jön. Sondai-aq būl jūmysqa älemdık üzdık oqu oryndaryn serıktes retınde tartu qajet. Ükımet jyl soŋyna deiın osy mäsele boiynşa naqty ūsynys beruge tiıs. Osyndai jaŋa oqu orny bızge ne üşın qajet degen saual da tuyndauy mümkın. Basty maqsat – ekonomikanyŋ barlyq salasyna jasandy intellekt tehnologiiasyn engızetın bılıktı mamandardy daiarlau. Zertteu universitetı ǧylym-bılım, innovasiia jäne halyqaralyq bailanys ortalyǧy retınde jūmys ısteuı kerek. Qazırgı jahandyq bılım jäne tehnologiia naryǧynda bäseke öte joǧary. Daryndy jastarymyz älemdık deŋgeidegı sapaly bılımdı tek şetelden emes, öz elımızden de alǧany dūrys. Būl – Qazaqstannyŋ bolaşaǧyna tıkelei äserı bar öte maŋyzdy mäsele»,– dedı prezident.
