Şymkent qalasyndaǧy “Bılım-innovasiia” qyz balalarǧa arnalǧan №2 lisei-internatynyŋ 11-synyp oquşysy Daiana Tulkunova halyqaralyq bılım keŋıstıgınde zor jetıstıkke jetıp, älemdık deŋgeidegı 8 bedeldı universitet pen mektepten resmi şaqyrtu aldy.
Atap aitqanda, Chinese University of Hong Kong (QS World #36), Germaniiadaǧy tolyq grant ūsynǧan Constructor University, SP Jain School of Global Management, Guangdong Medical University, Guangxi University of Electronic Technology (GUET), North China University of Science and Technology, Shandong University of Technology jäne İtaliiadaǧy tolyq grantpen şaqyrǧan H-Farm International School syndy oqu oryndary Daianaǧa esıgın aşty.
Sonymen qatar ol LaunchX jäne Lumiere Academy sekıldı bedeldı zertteu baǧdarlamalarynan grant ielenıp, ǧylymi jobalarmen ainalysuǧa mümkındık aldy. Daiana — International Biology Olympiad (OCSO) jäne INFOMATRIX halyqaralyq olimpiadalarynyŋ finalisı, soŋǧysynda qola medal jeŋıp alǧan. Būl tabystarynyŋ arqasynda AUES jäne AETU universitetterınen de bılım granttaryna ie boldy. Sonymen bırge, ol 2025 jyly Malaiziiada ötetın World Economic and Leadership Forum aiasynda älemdık jas köşbasşylar qataryna arnaiy şaqyrtu alǧan.
“Osy jyldyŋ basynda şetelge oquǧa tüsu turaly şeşımdı keş qabyldadym, bıraq eşqaşan keş emes ekenıne közım jettı. Qazır medisina jolyn taŋdadym. Armanym — elımnıŋ igılıgıne qyzmet etetın bılıktı hirurg bolu. Eŋ bastysy — senım men tynymsyz eŋbek bärın jeŋedı”, — deidı Daiana Tulkunova.
