Úsh balanyń anasy Baný Quljabaeva bir jarym jastaǵy balasynyń jarylystan keıin úzdiksiz jótelip, ishi óte bastaǵanyn aıtady. Ol "jarylystan beri aýyrmaǵan kúnimiz joq" dep keıidi.
"Apta saıyn aýrýhanaǵa aparam, apta saıyn basqa dári-dármek jazyp beredi. Odan nátıje bolmaǵan soń taǵy baramyz. Súıtip kele jatyrmyz. Bir jyl buryn balam reanımaııaǵa ókpe aýrýymen túsken. Endi sol aýrýy qaıta asqynyp bara jatyr. Ishi toqtamaı ótedi. Dárige de toqtamaıdy. Jarylysqa deıin ondaı bolmaǵan. Dárigerler de túsinbeı jatyr. Dıagnoz qoıa almaı jatyr" deıdi Baný Quljabaeva.
Qala turǵyndarynyń biri Aıgúl Dáýletovanyń aıtýynsha, jarylystan soń balalarynyń denesine jara shyǵyp, murny qanaıtyn bolǵan. Ol dári-dármek alýǵa qaltasy kótermeıtinin aıtyp, úkimetten kómek surady.
"Jarylystan keıin qyzymnyń denesine jara shyǵyp ketti. Óz qaltamyzdan aqsha shyǵaryp, amaldap jazyp aldyq. "Jarylystan soń ekologııa buzylmady" degenge senbeımiz. Arystyń árbir otbasyna úkimetten ótemaqy tólensin" dedi ol.
Kópbalaly jalǵyzbasty ana Aıman Bazarbaeva da bes balasynyń denesine jara shyǵyp, qınalyp jatqanyn aıtty. Onyń aıtýynsha, jaqynda arnaıy komıssııa kelip, tekserip ketken. Úsh balasynyń denesine shyqqan jaranyń beti qaıtqanymen, ekeýiniń jarasy jazylmaǵan.
"Jaldamaly páterde turamyn. Bes balamdy birdeı emdeýge, dári alýǵa shamam joq. Úkimetten alatyn 21 myń teńgeni qaıda jetkizemin? Páterden páterge tentirep júrmiz. Eń bolmasa ekologııaǵa ótemaqy berse bolady ǵoı" dedi ol ashýlanyp.
Ákimdik aldyna jınalǵan áıelder buǵan qosa birneshe aıdan beri jalǵasyp kele jatqan qurylys jumystarynyń sapasyna kóńili tolmaıtynyn aıtty. Arys turǵyny Baný Quljabaevanyń aıtýynsha, "jarylystan jańa salynǵan úıiniń ishi men syrtyna birdeı jaryqshaq túsken, biraq komıssııa ony "jarylystan búlindi" dep tanýdan bas tartqan".
"Shtabtan kelgen komıssııa músheleri meni mazaqtap, ursyp ketti. "Tamǵa jarylysqa deıin jaryqshaq túsken, eski tam bolsa bir jón" dedi. Búgin ákimdikte osy máseleni aıttym" dedi ol.
Narazy bir top áıeldi Arys qalasynyń ákimi Qadyrbek Murat ákimdik zalynda qabyldaǵan. Áıelderdiń aıtýynsha, ákim olarǵa "ekologııa úshin ótemaqy tólenbeıtinin" aıtyp túsindirgen. Al qurylys jumystaryna kóńili tolmaǵan áıelderge "jaqyn kúnderi saraptama tobyn jiberemiz, eger jóndeý jumystary qajet bolsa, qurylysshylardy jiberemiz" dep aıtqan.
Jıyrmaǵa jýyq áıeldiń ákimdikke talap qoıyp, narazylyq bildirgenin qalalyq ishki saıasat bóliminiń basshysy Aıbol Álibek rastady. Onyń sózinshe, Arys qalasy ekologııalyq aımaqqa jatady. Sondyqtan "jumys isteıtin azamattarǵa ǵana ótemaqy tólenedi". Onyń aıtýynsha, ákimdik aldaǵy ýaqytta áıelderdiń aryzyn tekseredi.
24 maýsymda Arys qalasynda áskerı qoıma jarylyp, tórt adam qaza tapqan. Resmı derek boıynsha, ondaǵy oq-dáriniń 70 paıyzdan astamy jarylyp ketken. Qaladaǵy turǵyn úılerdiń basym bóligi búlingen. Bılik ókilderi jarylystan búlingen úılerdi jóndeýge memleket kómektesedi dep ýáde bergen.
Túrkistan oblystyq ákimdigi 9 qyrkúıekte qalada 8600-den astam turǵyn úı baryn, 7 000-nan astam turǵyn jáne kópqabatty úılerde qurylys jumystary aıaqtalǵanyn habarlaǵan. Buǵan deıin de keıbir turǵyndar "qurylystyń baıaý júrip jatqanyn", "sapasyzdyǵyn" aıtyp shaǵymdanǵan.
"Azattyq" radıosy
