Almatyda ötken jyly bolǧan jas student Aqnär Hamittıŋ qazasy qoǧam nazaryn audartqan qaiǧyly oqiǧalardyŋ bırıne ainaldy. 22 jastaǧy daryndy qyzdyŋ ölımıne qatysty jantürşıgerlık derekter paida bolyp, ıs boiynşa tuystary ädıl tergeu jürgızılmei jatqanyn alǧa tartuda, der habarlaidy “Adyrna” ūlttyq portaly.
Byltyr şılde aiynda tüngı saǧat 02:54 şamasynda Aqnär Hamit Almatydaǧy Amir tūrǧyn üi keşenınıŋ 7-qabatynan qūlap, auyr jaraqatpen auruhanaǧa jetkızıledı. Därıgerler onyŋ ömırın saqtap qala almady. Resmi mälımetterge säikes, qylmystyq ıs QR QK 105-baby 1-bölıgı – «Özın-özı öltıruge deiın jetkızu» boiynşa qozǧalǧan.
Alaida, marqūmnyŋ anasy Gülıstan Hamit qyzynyŋ ölımıne özge adamdardyŋ qatysy bar dep esepteidı. Onyŋ aituynşa, Aqnärdıŋ denesınen azaptau belgılerı anyqtalǧan. Moinynda qylqyndyru ızderı, keŋırdegınde tyrnalǧan jerler, tyrnaq pen şaş jūlynǧan. Anasynyŋ aituynşa, būl qyzdyŋ soŋǧy sätterınde qatty azap şekkenın körsetedı.
Aqnärdı ölım tünınde päterge R. jäne D. esımdı ekı qyz aldap şaqyrǧan. Qyzdar özderın tauar aluşy retınde körsetıp, WeChat messenjerınde arnaiy top qūryp, Aqnärden kiım-keşek äkeludı sūraǧan. Ol saudamen ainalysatyn bolǧan. Sol tünı Aqnär keşkı 19:40-ta päterge kırıp, tüngı 02:54-te terezeden qūlaidy.
Marqūmnyŋ anasy sol ekı qyzdyŋ qyzyn terezeden iterıp jıbergenıne senımdı. Onyŋ aituynşa, būl turaly beinejazbany da öz betımen tauyp, tergeu organdaryna tapsyrǧan. Bıraq tergeu älı nätije bermegen. Küdıktı retınde atalǧan ekı qyz uaqytşa qamauǧa alynu turaly qaulyǧa qaramastan, bostandyqta jürgen körınedı.
«Qazırgı uaqytta bolǧan oqiǧanyŋ tolyq körınısın anyqtau üşın jan-jaqty tergeu jürıp jatyr. Tergeu şeŋberınde materialdar jinaqtalyp, taldanuda, kuälardan jauap alynuda, beinejazbalar zerdelenude, zaŋda közdelgen basqa da ıs jürgızu äreketterı oryndaluda. Tergeu barysy Departament basşylyǧynyŋ erekşe baqylauynda. Onyŋ nätijelerı boiynşa qoldanystaǧy zaŋnama aiasynda şeşım qabyldanatyn bolady», - dedı Almaty qalalyq polisiia departamentınıŋ ökılı.
Gülıstan Hamit tergeudıŋ sapasyna, ädıletsızdıkke jäne ısteǧy kümändı şeşımderge narazylyq bıldırıp otyr. Onyŋ aituynşa, būrynǧy tergeuşı mäiıttıŋ jaraqattaryn körsetetın fotolardy saraptamaǧa tapsyrmaǧan. Psihologiialyq saraptama da anasynyŋ bergen materialdaryn eskermegen. Tergeu barysynda USB fleşka "aşylmai qaldy" degen syltau aitylǧan.
Sonymen qatar, ol 20 şılde künı taŋǧy saǧat 11-de qyzdardyŋ bırınıŋ 8 mln teŋgenı Kaspi bankınıŋ bölımşesınen şeşıp alǧany turaly derekke de polisiia tarapynan resmi jauap berılmegenın aitady. Būl jait tergeuge kedergı keltıretın jemqorlyq faktorlary boluy mümkın degen küdık tudyrǧan.
Aqnär Hamit – Qytaidan Qazaqstanǧa köşıp kelgen otbasynan şyqqan, önerlı ärı bılımdı boijetken. Ol KİMEP universitetınde oqyǧan, bırneşe şet tılın meŋgerıp, halyqaralyq kompaniialarda jūmys ıstegen. Muzyka men kino salasynda da tanylǧan. Belsendı, armany asqaq, eŋbekqor qyz bolǧanyn dostary men ūstazdary eske alady.
Qaiǧydan qan jūtqan anasy Aqnärdıŋ ölımıne bailanysty qylmystyq ıstıŋ «Özın-özı öltıruge jetkızu» emes, «Adam öltıru» jäne «Azaptau» baptary boiynşa qaita saralanuyn talap etude. Ol IIM-ge, Bas prokuraturaǧa, Prezident äkımşılıgıne bırneşe märte hat joldap, ıstıŋ ädıl qaraluyn sūraǧan.
Bügınde ıs Almaty qalalyq Polisiia departamentınıŋ qarauynda. Resmi organdar tergeu jürıp jatqanyn, barlyq materialdar jinaqtalyp, taldanyp jatqanyn aitqanymen, naqty nätije joq.
