Resei Federasiiasy qūramyndaǧy Şeşenstan Respublikasynyŋ basşysy Ramzan Qadyrov 20 jastaǧy ūly Ahmat Qadyrovty respublika ükımetı töraǧasynyŋ orynbasary mındetın atqaruşy qyzmetıne taǧaiyndady, dep habarlaidy "Adyrna" ūlttyq portaly.
Mälımetke säikes, Ahmat Qadyrov jaŋa qyzmetımen qatar Şeşenstannyŋ sport ministrı qyzmetın de qatar alyp jürmek.
Sonymen qatar Şeşenstannyŋ ūlttyq saiasat, syrtqy bailanystar, baspasöz jäne aqparat ministrı Ahmed Dudaevtyŋ da qyzmetı joǧarylaǧan. Ramzan Qadyrov būl kadrlyq özgerıster ükımet basşysy Magomed Daudovtyŋ ūsynysymen jüzege asqanyn aityp, olardy «kadr mäselesındegı şaǧyn özgerıster» dep atady. Būl turaly ol özınıŋ Telegram-arnasynda jazdy.
Şeşenstan basşysy ūlynyŋ qyzmettık ösuın özınıŋ densaulyǧyna bailanystyryp jatqan aqparattardy resmi türde rastaǧan joq. Būǧan deiın keibır BAQ-ta Ramzan Qadyrovtyŋ jaŋa jyl qarsaŋynda Mäskeude auruhanaǧa tüskenı jönınde habar taraǧanymen, būl derek resmi türde rastalmaǧan.
Aita keteiık, Qadyrov äuletınıŋ özge de müşelerı Şeşenstan bilık qūrylymdarynda joǧary lauazymdardy ielenıp otyr. Mäselen, onyŋ qyzy Hadijat 24 jasynda Şeşenstan basşysy men ükımetı äkımşılıgı jetekşısınıŋ bırınşı orynbasary qyzmetıne taǧaiyndalǧan. Ahmat Qadyrov būǧan deiın 18 jasynda sport ministrınıŋ orynbasary, jastar ısı jönındegı ministr jäne «Ahmat» futbol klubynyŋ prezidentı bolǧan.
Al Qadyrovtyŋ taǧy bır ūly Adam 16 jasynda äkesınıŋ qauıpsızdıgın qamtamasyz etu qūrylymyn basqarǧan, keiın Gudermes qalasyndaǧy Vladimir Putin atyndaǧy Reseidıŋ arnaiy maqsattaǧy universitetınıŋ kuratory bolyp taǧaiyndalǧan.
