Ukrainanyŋ memlekettık “Ömır sürgım keledı” jobasy Resei jaǧynda Ukrainaǧa qarsy soǧysqa qatysqan nemese qatysyp jatqan 660-tan astam Qazaqstan azamatynyŋ tızımın jariialady, dep habarlaidy “Adyrna” ūlttyq portaly “Azattyq radiosyna” sıltep.
Atalǧan tızımde azamattardyŋ aty-jönı, tuǧan jyly, äskeri kelısımşartqa otyrǧan künı, jeton nömırı jäne qaza tapqan künı körsetılgen. Joba mälımetınşe, būl tızımdegı 661 adamnyŋ 78-ı qaza tapqan.
“Būl – tek bızde naqty derekterı bar, ölım künı men jerlengen orny belgılı azamattar. Volonterlerdıŋ mälımetınşe, 2024 jyldyŋ qazan aiynda Ukrainada qaza tapqan etnikalyq qazaqtardyŋ sany 3000-nan asqan”, – delıngen habarlamada.
Joba būl tızımdı Resei armiiasy qolbasşylyǧyndaǧy “özderınıŋ adamdarynan” alǧanyn aitady. Būl – aldaǧy uaqytta jariialanatyn şeteldık jaldamalylar turaly mälımetterdıŋ alǧaşqy bölıgı.
Qazaqstan bilıgı öz azamattarynyŋ Ukrainadaǧy soǧysqa qatysuy turaly aqparatqa resmi türde jauap bermedı. Qazaqstan ışkı ıster ministrınıŋ orynbasary İgor Lepioha būl mälımetterdıŋ naqtylyǧyn tekseru qajet ekenın aitty.
“Būl sandardyŋ qanşalyqty şyndyqqa säikes keletının bılmeimız. Olardy tekseru kerek. Qazır men naqty aqparat bere almaimyn”, – dedı Lepioha.
Aita keteiık, Qazaqstanda şeteldık äskeri qaqtyǧystarǧa qatysqan azamattar zaŋ boiynşa jaldamaly jauynger retınde qylmystyq jauapkerşılıkke tartylady.
Ūqsas jaŋalyqtar
