Ýkraınanyń memlekettik “Ómir súrgim keledi” jobasy Reseı jaǵynda Ýkraınaǵa qarsy soǵysqa qatysqan nemese qatysyp jatqan 660-tan astam Qazaqstan azamatynyń tizimin jarııalady, dep habarlaıdy “Adyrna” ulttyq portaly “Azattyq radıosyna” siltep.
Atalǵan tizimde azamattardyń aty-jóni, týǵan jyly, áskerı kelisimshartqa otyrǵan kúni, jeton nómiri jáne qaza tapqan kúni kórsetilgen. Joba málimetinshe, bul tizimdegi 661 adamnyń 78-i qaza tapqan.
“Bul – tek bizde naqty derekteri bar, ólim kúni men jerlengen orny belgili azamattar. Volonterlerdiń málimetinshe, 2024 jyldyń qazan aıynda Ýkraınada qaza tapqan etnıkalyq qazaqtardyń sany 3000-nan asqan”, – delingen habarlamada.
Joba bul tizimdi Reseı armııasy qolbasshylyǵyndaǵy “ózderiniń adamdarynan” alǵanyn aıtady. Bul – aldaǵy ýaqytta jarııalanatyn sheteldik jaldamalylar týraly málimetterdiń alǵashqy bóligi.
Qazaqstan bıligi óz azamattarynyń Ýkraınadaǵy soǵysqa qatysýy týraly aqparatqa resmı túrde jaýap bermedi. Qazaqstan ishki ister mınıstriniń orynbasary Igor Lepıoha bul málimetterdiń naqtylyǵyn tekserý qajet ekenin aıtty.
“Bul sandardyń qanshalyqty shyndyqqa sáıkes keletinin bilmeımiz. Olardy tekserý kerek. Qazir men naqty aqparat bere almaımyn”, – dedi Lepıoha.
Aıta keteıik, Qazaqstanda sheteldik áskerı qaqtyǵystarǵa qatysqan azamattar zań boıynsha jaldamaly jaýynger retinde qylmystyq jaýapkershilikke tartylady.
