Májilis depýtaty, Respublica partııasy teń tóraǵalarynyń biri Dınara Shúkijanova óz erkimen mandatyn tapsyryp, óńirdegi óndirispen aınalysatynyn aıtty.
«BÁLKIM, DEMOKRATIIaNYŃ BELGISI ShYǴAR»
Jalpy depýtattardyń mandatyn óz erkimen tapsyryp ketýi sırek, tosyn jaǵdaı. Sondyqtan da Dınara Amanjelqyzyna depýtattyq mandatty tapsyryp berýge bireý ıtermelegen joq pa dep suraq qoıdyq. Bul suraqqa eks-depýtat «Joq» dep jaýap berdi.
– Bul nusqanyń negizsiz ekenin birden ashyp alaıyq. Iá, depýtat mandatyn óz erkimen tapsyrý tosyn áreket bolýy múmkin. Biraq meniń sheshimdi quptaǵany úshin áriptesterime alǵysymdy bildiremin. Depýtattar búgin meni óz jumysymmen aınalysýǵa jiberýdi qoldap, daýys berdi. Bul úshin Májilis tóraǵasy Erlan Jaqanulyna alǵysymdy bilderemin. Bálkim, bul «Jańa Qazaqstannyń», demokratııalyq el bolýdyń belgisi shyǵar. Mysaly, biz partııa ishinde ornymyzdy rotaııa arqyly jańartyp, bir orynǵa jabysyp otyrmaımyz dep kelisken bolatynbyz. Muny biz is júzine asyryp jatyrmyz, – dedi ol.
Dınara Shúkijanova jas ári jigerli depýtat bolǵanymen, memlekettik tildi bilmeıtinimen este qaldy. Qazaq tilindegi suraqqa orys tilinde jaýap bergennen keıin «Amerıkalyq dıplomat 9 aıda qazaq tilin úırenip aldy. Parlamentte depýtat bolǵan 10 aıdyń ishinde qazaq tilin úırenbegenińiz uıat emes pe?» dep suraq qoıdyq. Keıbir orys tildi jýrnalıster «Negizsiz suraq» dep jaýap bermeýdi suraǵanda eks-depýtat «Durys suraq» dep qazaq tilinde jaýap berýge tyrysty.
– Men sizge qazaqsha aıta beremin. Men qazaq tilin de úırendim. Qazir qazaqsha da, oryssha da, aǵylshynsha da sóıleımin. Siz durys aıtasyz, Parlamentke kelgende qazaqsha óte qınalyp sóıledim. Qazir de meniń oıymsha, meniń qazaq tilim jaqsy emes. Moıyndaımyn. Biraq bizdiń komıtettiń otyrystary qazaq tilinde bolady. Sonda mende qazaqsha sóıledim. Sonymen sizdiń suraǵyńyz «Nege qazaq tilinde sóılemeısiń?» durys emes. Iaǵnı, men qazaqsha sóıleımin, – dep jaýap berdi kelgeninen keteri tez bolǵan depýtat.
«ÁLI ShEShILGEN JOQ»
Respublica partııasynyń tóraǵasy ári Májilis depýtaty Aıdarbek Qojanazarov Dınara Shúkijanovanyń depýtattyq mandatyna baılanysty partııa ishinde qaıshylyq joq ekenin aıtty.
– Dınara Shúkijanovamen partııa qurylmaı turǵan kezeńnen jaqyn dospyz jáne budan keıinde jaqyn aralasamyz. Bul – aramyzda eshqandaı qaıshylyq bolmaǵanynyń belgisi. Ol bizdiń partııamyzdyń teń tóraǵasy jáne Ortalyq keńestiń múshesi bolyp qalady. Birinshiden, Dınara Shúkijanova ózine qoıylǵan maqsattaryna jetti. Taıaýda «Endi men jańa joba almaı, depýtattyq mandatty ótkizip, basqa kandıdattardy engizbeımiz be?» degen usynyspen shyqty. Áriptesterimizben birge aqyldasyp, shynymen de bizdiń artymyzdan kele jatqan kandıdattardy aldymyzǵa nege shyǵarmaımyz degen oı boldy. Sondaı-aq bizdiń saılaýshylarymyzǵa jáne bizge daýys bermegen adamdarǵa da, bizdiń tizimde laıyqty kandıdattar bar ekenin kórsetý saıasatymyz boldy. Endigi saılaýda kóbirek oryn berse, mundaı aınalym bolmaı basynan bastap aıaǵyna deıin jumys isteıtin edik, – dedi ol.
Partııa jetekshisi Dınara Shúkijanovanyń ornyna kim depýtat bolatynyn ashyq aıtpady.
– Qazir men sizge ondaı aqparatty bere almaımyn. Sebebi ol basqa kandıdattar úshin ádiletsiz bolady. Bir aptanyń ishinde biz sheshim qabyldaımyz. Kimniń depýtat bolatyny áli sheshilgen joq, – dedi ol.
Serik Joldasbaı
«Adyrna» ulttyq portaly
