Jańaózen qalasynda meshit aýmaǵynda órt bolyp, kámeletke tolmaǵan balanyń denesin kúıik shaldy. Bul týraly oblystyq tótenshe jaǵdaılar departamenti málimdedi, dep habarlaıdy “Adyrna” ulttyq portaly.
Oqıǵa 6 naýryz keshke bolǵan. Tótenshe jaǵdaılar mamandarynyń aıtýynsha meshittiń kilemi órtengen.
"Shańyraq yqsham aýdanynda keshke qalalyq meshitte órt boldy. 40 sharshy metr aýmaq janǵan. Órttiń neden shyqqany tekserilip jatyr", - deıdi oblystyq tótenshe jaǵdaılar departamenti.
Al órtten zardap shekken 11 jastaǵy jasóspirimniń jaǵdaı aýyr deıdi dárigerler.
"Bala termııalyq kúıik alǵan, bet-aýzy, moıny, joǵarǵy tynys alý joldary, jalpy denesiniń biraz bóligi kúıip qalǵan. Qazirgi ýaqytta balanyń jaǵdaıy aýyr. Qajetti em-sharalar jasalyp jatyr", - deıdi Jańaózen qalalyq aýrýhanasynyń mamandary.
