Búgin Astananyń "Maıskıı" dep atalatyn saıajaı massıvinde apaly-sińlili Raýshan jáne Nesipkúl Uıabaevalar men olardyń baýyrlary turatyn jer úıdi súrdi. Turǵyndar úıiniń syrtyna Qazaqstan prezıdenti Nursultan Nazarbaevtyń sýretterin japsyryp tastaǵan. Bul týraly Azattyq radıosy jazdy, dep habarlaıdy “Adyrna” ulttyq portaly.
Nesipkúldiń Azattyqqa aıtýynsha, sáýirdiń ortasynda Qazaqstan prezıdenti Nursultan Nazarbaev EKSPO-2017 kórmesi qarsańynda "qala kórkin buzatyn eski úılerdiń" áli de qalǵanyna ashýlanyp, synaǵan soń jergilikti bılik ókilderi úılerin bosatýdy talap etip jıi kele bastaǵan.
«50 sharshy metr bolatyn úıimizdi 2007 jyly saldyq. Baýyrlarym bar, barlyǵy jeti adam turyp jatyrmyz. Jer telimimizdi memleket muqtajdyǵyna qajet" degen sebeppen alý úshin 2014 jyldan bastap úıdi bosatýdy talap ete bastady. Sol jyly ótemaqy retinde 400 dollar usynǵan. Al bıyl 4 mıllıon 700 myń teńge usyndy. Mundaı aqshaǵa páter satyp ala almaımyz. Sheneýnikter tym bolmasa prezıdentten qorqatyn shyǵar degen oımen prezıdenttiń sýretin japsyryp qoıdyq», - deıdi Nesipkúl Uıabaeva.
Ol saıajaı massıvindegi úılerdi súrý týraly sot sheshimin Esil aýdandyq soty 2014 jyly ózderiniń syrtynan shyǵarǵanyn, biraq ol sheshim qolyna tımegenin aıtady.
"Maıskıı" saıajaı massıvi qazir qorshalyp tur. Mundaǵy úılerdiń kópshiligi buǵan deıin súrilgen, keıbiri bos tur. Resmı málimet boıynsha, bosaǵan aýmaqqa áleýmettik nysan salynbaq.
Qazaqstan konstıtýııasyna engizilgen ózgeris boıynsha, tuńǵysh prezıdent Nursultan Nazarbaevtyń sýretin búldirýge, jyrtýǵa tyıym salynǵan.
