تاجىكستان پرەزيدەنتى ەمومالي راحمون 13 ناۋرىزدا تۇڭعىش رەت مەملەكەتتىك ساپارمەن قىرعىزستانعا ساپارلادى. بۇل تۋرالى قىرعىزستان پرەزيدەنتىنىڭ ءباسپاسوز قىزمەتى مالىمدەدى، دەپ حابارلايدى "ادىرنا" ۇلتتىق پورتالى.
تاجىكستان كوشباسشىسىن بىشكەكتەگى «ماناس» حالىقارالىق اۋەجايىندا قىرعىزستان پرەزيدەنتى سادىر جاپاروۆ قارسى الدى.
«ۇلتتىق كيىمدەگى قىزدار ەمومالي راحموندى گۇل شوقتارىمەن قارسى الدى. مەملەكەت باسشىلارىنا قىرعىز جانە تاجىك ونەرپازدارى ورىنداعان مۋزىكالىق شىعارمالار ۇسىنىلعان كونتسەرتتىك باعدارلاما كورسەتىلدى»، – دەلىنگەن رەسمي حابارلامادا.
مەملەكەتتىك ساپار اياسىندا ەكى ەل باسشىلارى ەكىجاقتى ىنتىماقتاستىقتى دامىتۋ جانە ماڭىزدى ماسەلەلەردى تالقىلايدى. سونداي-اق بىرنەشە ەكىجاقتى كەلىسىمدەرگە قول قويىلادى دەپ جوسپارلانعان.
قىرعىزستان پرەزيدەنتى اكىمشىلىگىنىڭ سىرتقى ساياسات ءبولىمىنىڭ جەتەكشىسىنىڭ مالىمدەۋىنشە، ەمومالي راحموننىڭ ساپارى بارىسىندا قىرعىزستان مەن تاجىكستان اراسىنداعى مەملەكەتتىك شەكارا تۋرالى كەلىسىمگە قول قويىلادى.
ايتا كەتەيىك، 21 اقپاندا بىشكەكتە وتكەن قىرعىزستان مەن تاجىكستان ۇكىمەتتىك دەلەگاتسيالارىنىڭ بىرلەسكەن وتىرىسىندا شەكارا ماسەلەسى بويىنشا تۇپكىلىكتى حاتتاماعا قول قويىلعان بولاتىن.
