Mädeniet jäne aqparat ministrı Aida Balaeva «EL ARNA» jäne «Habar» telearnalaryn bırıktıru turaly strategiialyq şeşım qabyldanǧanyn mälımdedı, dep habarlaidy “Adyrna” ūlttyq portaly.
Būl qadam otandyq telekompaniialardyŋ tiımdılıgın arttyryp, qazaqstandyq kontent auditoriiasyn keŋeituge baǧyttalǧan.
Ministrdıŋ habarlauynşa, «EL ARNA» jäne «Habar» telearnalaryn bırıktıru 2025 jyldyŋ 1 mamyryna deiın aiaqtalady. «EL ARNA»-nyŋ barlyq qūndy kontentı «Habar» arnasynyŋ efirıne ötedı.
«Būl üzdık jobalardyŋ saqtaluyna, olardy keŋ auditoriiaǧa qoljetımdı etuge jäne odan ärı damytuǧa mümkındık beredı. «EL ARNA» telearnasy otandyq körkem jäne derektı filmder, serialdar, sondai-aq mädeni-aǧartuşylyq baǧdarlamalar körsetıletın platforma retınde maŋyzdy missiia atqardy. Bız būl arnanyŋ ūlttyq kinematografiia men televiziianyŋ damuyna qosqan ülesın joǧary baǧalaimyz», dep jazdy Aida Balaeva.
Mädeniet jäne aqparat ministrlıgı «EL ARNA» telearnasynyŋ ūjymyna köpjyldyq eŋbekterı, käsıbilık pen otandyq media keŋıstıktı damytuǧa qosqan ülesterı üşın şynaiy alǧysyn bıldırdı.
Aita keteiık, qaita ūiymdastyru prosesı barysynda barlyq qyzmetkerler «Habar» agenttıgıne jūmysqa ornalastyrylady. Jalaqy deŋgeiı saqtalyp, olardyŋ täjıribesı men bılımı jaŋa jobalarda sūranysqa ie bolady.
«EL ARNA» telearnasynyŋ baǧdarlamalaryn öndıru jäne taratuǧa bölıngen qarjy «24KZ» jäne «Habar» siiaqty strategiialyq maŋyzdy telearnalardyŋ kontentın küşeituge jäne tehnikalyq bazasyn uaqtyly jaŋartuǧa qaita bölınedı. «EL ARNA» telearnasynyŋ qyzmetıne atsalysqan barşa jandarǧa şynaiy rizaşylyǧymdy bıldıremın jäne aldaǧy uaqytta jaŋa jetıstıkter, şyǧarmaşylyq şabyt pen tolaiym tabys tıleimın!», dedı Mädeniet jäne aqparat ministrı.
Esterıŋızge sala keteiık, «EL ARNA» telearnasy 2000 jyldyŋ 22 nauryzynda alǧaşqy ūlttyq memlekettık tıldegı arna retınde «Habar-2» atauymen qūryldy.
2002 jyldyŋ nauryzynda atauy «EL ARNA» bolyp özgertılıp, ekı tılde habar taratuǧa köştı.
2014 jyldyŋ nauryzynda arna öz jūmysyn toqtatyp, onyŋ jiılıgınde «24KZ» jaŋalyqtar telearnasy ıske qosyldy.
2017 jyldyŋ 27 nauryzynda «EL ARNA» jaŋa formatta otandyq kinoarna retınde qaita ıske qosylyp, 2024 jyldan bastap «EL ARNA» jastarǧa arnalǧan oiyn-sauyq arnasy retınde qaita qūrylymdaldy.
