Dýblınde mońǵol kórshilerimmen páterdi bólisip turamyz. Osynda 5 myń mońǵol bar. Tiri mońǵolmen betpe bet jaqyn aralasýym osy eken. Basynda qalalyq mádenıetke onsha-munsha kelińkiremeıtin dúńk minezderin kórip shoshyp, onsha jýyǵym kelmegen.
Iaǵnı, unamaı tursa unatpaıdy, máımóńkelemeıdi. Kishkene jýasyp sóılese qaıtedi eken degenim ǵoı. Biraq nıetiń taza ekenin bilse qolyndaǵy baryn beretin qyzyq halyq. Bir kúni tańǵy as, bir kúni keshki as ákep turady. Kún sýytyp ketti dep qalyń jempir syılaıdy. Búgin ulttyq merekelerine oraı “ájem pisirdi” dep nan men qurtyn úıip ákepti. Dám tat degeni. Kóshpendi halyq bolǵan soń nandy ońaıshylyqpen kógermeıtindeı etip pisirgen, peshten jańa shyqqan emes kebejeden shyqqan dám bar
Qurt-nanyn aralastyra tabaq tartqan mádenıetine qarańyz, taza kóshpeýı. Tátti qurty, ashty qurty aralasyp jatyr. Qala halqyna uqsaǵysy keletin sábettik tyrashtaný, sándeý joq. Býddızmdi ustanǵanymen, ómir salty, sezinýi baıaǵy táńirlik senimmen qalǵandaı kórindi. Eshkimge eliktemeıdi, taıpaq kelgen boılarymen “mońǵolmyz” dep qarap turady. Birde orys, birde arab, birde kosmopolıt, áıteýir bári bolǵysy keletin, biraq qazaq bolǵysy kelmeıtin ózimizdi oılap, muńaıyp qurt qajap otyrmyn. Aıtpaqshy bizdiń qyzyl sıyrlar emes, osy qurttar qodastyń sútinen jasalǵan-aý.
Jahandaný jaǵdaıynda mádenıetter birkelkilenip bara jatyr deımiz. Biraq sonyń osy kisilerge qatysy az ba dedim. Sovettik otarlanýǵa túspegende, ıslamnyń yqpaly kúsheımegende shirkin, biz qalaı bolar edik?! Osylarǵa qarap 100 álde 200 jyl burynǵy ótken shaǵymyzdy elestetip otyrmyn. Qol qýsyryp otyrmaı, elden ákelgen sary qazymdy ortaǵa bir asyp, meımandos qazaq ekenimdi bir kórsetsem be dep qoıam...
Qurmetpen, ózi bolýdan uıalatyn ulttyń ókili.
Aya Omirtay
