Oralda belgili aıtysker aqyn, Qazaqstannyń eńbek sińirgen mádenıet qyzmetkeri, qoǵam qaıratkeri Sholpan Batyrqyzy Qydyrnııazova 76 jasqa qaraǵan shaǵynda dúnıeden ótti, dep habarlaıdy “Adyrna” ulttyq portaly.
Sholpan Qydyrnııazova 1949 jyly 6 mamyrda Batys Qazaqstan oblysy, Qaratóbe aýdany, Qarakól aýylynda dúnıege kelgen. Ol ádebıet pen jýrnalıstıka salasynda jemisti eńbek etip, Qaratóbe aýdandyq «Eńbek týy» gazetinde qyzmet atqarǵan.
Aqyndyq ónerimen tanylǵan ol 1980 jyly respýblıkalyq aqyndar aıtysynda bas júldege ıe bolyp, Qazaq SSR-iniń eńbek sińirgen mádenıet qyzmetkeri ataǵyna laıyq dep tanyldy. Aqyn aıtys sahnasynda elýden astam aıtysqa qatysyp, óz zamanynyń sóz sheberlerimen sóz qaǵystyrǵan.
Sholpan Batyrqyzy tek aıtysker aqyn ǵana emes, til saıasaty men mádenıet salasynda da óz qoltańbasyn qaldyrǵan tulǵa. 2004-2008 jyldary Batys Qazaqstan oblysy tilderdi damytý basqarmasynyń basshysy retinde óńirde memlekettik til men onomastıka salasynyń damýyna aıtarlyqtaı úles qosty.
Aqynnyń aıtystary «Jyr shashý», «On alty qyz, bir jigit» jınaqtaryna engen. Sondaı-aq, ol «Jazıra» (1982), «Erke qus» (1992), «Eligi erkin dalanyń…» (2004), «Qos qanat» (2010), «Qaratóbem, qasıetti qushaǵyń» (2015), «Meniń tárbıe saǵatym» (2016), «Anadan – aqyl, ájeden – ádep» (2019) syndy jyr, aıtys jáne naqyl sózder jınaqtaryn jaryqqa shyǵardy.
Eńbegi elenip, «Qurmet» ordenimen, «Qazaqstan Konstıtýııasyna - 10 jyl», «Qazaqstan máslıhatyna - 20 jyl», «Eren eńbegi úshin» medaldarymen marapattaldy. Qaratóbe aýdanynyń qurmetti azamaty atandy.
