Жаңаөзен қаласында мешіт аумағында өрт болып, кәмелетке толмаған баланың денесін күйік шалды. Бұл туралы облыстық төтенше жағдайлар департаменті мәлімдеді, деп хабарлайды “Адырна” ұлттық порталы.
Оқиға 6 наурыз кешке болған. Төтенше жағдайлар мамандарының айтуынша мешіттің кілемі өртенген.
"Шаңырақ ықшам ауданында кешке қалалық мешітте өрт болды. 40 шаршы метр аумақ жанған. Өрттің неден шыққаны тексеріліп жатыр", - дейді облыстық төтенше жағдайлар департаменті.
Ал өрттен зардап шеккен 11 жастағы жасөспірімнің жағдай ауыр дейді дәрігерлер.
"Бала термиялық күйік алған, бет-аузы, мойны, жоғарғы тыныс алу жолдары, жалпы денесінің біраз бөлігі күйіп қалған. Қазіргі уақытта баланың жағдайы ауыр. Қажетті ем-шаралар жасалып жатыр", - дейді Жаңаөзен қалалық ауруханасының мамандары.
