Búgin Shymkenttegi «Dostyq úıinde» Shymkent qalasynyń ákimi, qalalyq Qazaqstan halqy Assambleıasynyń tóraǵasy Ǵabıt Syzdyqbekovtyń qatysýymen 1 naýryz – Alǵys aıtý kúni jáne Qazaqstan halqy Assambleıasynyń 30 jyldyǵyna arnalǵan «Alǵys aıtý – adamgershiliktiń belgisi» taqyrybyndaǵy merekelik is-shara ótti.
Is-shara aıasynda Shymkent qalasynyń áleýmettik-ekonomıkalyq damýyna úles qosyp júrgen etnos kásipkerleri óndiretin ónimderdiń kórmesi uıymdastyryldy. Qalalyq assambleıa músheleri men etnomádenı birlestikterdiń tóraǵalary «Qazaq eline myń alǵys!» monýmentine gúl qoıyp, QHA-nyń 30 jyldyǵyna arnalǵan «Birlik pen kelisim jolyndaǵy 30 jyl» eskertkish taqtasyn ashty. Al «Alǵys» kerýenin sán-saltanatpen kútip alý rásimi kópshilikke erekshe áser qaldyrdy.
«Dostyq úıi» ǵımaratynda qalalyq etnomádenı birlestikterdiń tarıhı-tanymdyq kórmesi jurtshylyq nazaryna usynylyp, halqymyzdyń mádenı-tarıhı baılyǵy men etnostar tarıhynan syr shertetin eskponattar tanystyryldy.
Qala ákimi Ǵabıt Syzdyqbekov saltanatty is-sharaǵa qatysýshylar aldynda Memleket basshysy, Qazaqstan halqy Assambleıasynyń Tóraǵasy Qasym-Jomart Kemeluly Toqaevtyń quttyqtaýyn oqyp berdi.
– Assambleıa jyldar boıy halqymyzdyń yrysty yntymaǵyn nyǵaıtýǵa, qoǵamdaǵy ózara túsinistik pen kelisimdi saqtaýǵa ólsheýsiz úles qosyp keledi. Osy uıymnyń belsendi qyzmeti arqyly elimizdegi barlyq etnostyń tilin, mádenıeti men salt-dástúrin úılesimdi damytýǵa, sondaı-aq qazaq tiliniń etnosaralyq qatynas tili retindegi mártebesin kóterýge jol ashyldy.
Parlamentte ókilderi bar Qazaqstan halqy Assambleıasy memleket pen qoǵam arasynda ashyq dıalog ornatqan tıimdi qurylymǵa aınaldy. Uıym músheleri mańyzdy bastamalar kóterip, elge qajetti jobalardy júzege asyryp jatyr, Qazaqstandaǵy aýqymdy ózgeristerge de barynsha atsalysyp keledi, – dep QHA Tóraǵasynyń quttyqtaýyn jetkizgen qala ákimi jurtshylyqty 1 naýryz – Alǵys aıtý kúnimen jáne Assambleıanyń 30 jyldyǵymen quttyqtady.
Aıta keteıik, 1 naýryzda qurylǵanyna 30 jyl tolǵan Qazaqstan halqy Assambleıasy búginde qoǵamdyq kelisim men jalpyulttyq birlikti bekemdeý, etnosaralyq kelisimdi saqtaý jáne qazaqstandyq patrıotızmdi dáripteý syndy etnosaıasat aıasyndaǵy maqsat-mindetterdi abyroımen atqaryp keledi.
Búginde qalalyq QHA janyndaǵy 16 etnomádenı birlestik pen 7 qoǵamdyq qurylym berekeli birlik jolyn kózdegen bastamalar men jobalardy qoldap, qýattaýdan shet qalǵan emes.
Tuǵyrly tatýlyqty tý etken sanalýan shymkenttik etnos ókilderi tarıhy tereń Shymqalanyń qoǵamdyq-saıası, áleýmettik-ekonomıkalyq ómirine aralasyp, elimizdegi úshinshi megapolıstiń ósip-órkendeýine laıyqty úles qosýda.
