Almaty soty 22 jastaǧy Auǧanstan azamatşasynyŋ apelliasiialyq şaǧymyn qanaǧattandyrmady. Ol bırneşe aidan berı Qazaqstanda bosqyn märtebesın alu üşın küresıp jatqan, dep habarlaidy “Adyrna” ūlttyq portaly Ulysmedia.kz saityna sıltep.
Aqparatqa säikes, qyzdy tuǧan elıne küşpen jıberu mümkın, öitkenı Almaty qalasynyŋ Jūmyspen qamtu jäne äleumettık baǧdarlamalar basqarmasy oǧan bosqyn märtebesın beru üşın negız joq dep tapty.
“Qyz (maqalada qauıpsızdık maqsatynda onyŋ aty özgertılgen) Basqarmaǧa qarsy sot ısın qozǧaǧan, bıraq sot ony qoldamady jäne 25 aqpanda onyŋ apelliasiialyq şaǧymy da qanaǧattandyrylmady. Endı Auǧanstan azamatşasyna Joǧarǧy sotqa şaǧymdanu kerek”, dep habarlady onyŋ advokaty Gülmira Quatbekova.
Belgılı bolǧandai, qyz 2023 jyldyŋ jeltoqsanynan berı Qazaqstanda tūryp jatyr, medisinalyq universitette oqyǧan, bıraq oquyn tölei almai qalǧandyqtan ony tastauǧa mäjbür bolǧan. Otanynda ol äielder qūqyqtaryn qorǧaumen ainalysqan — şeteldık ūiymdarmen yntymaqtastyqta bolyp, qyzdarǧa sabaq berıp, Batys medialarymen bailanysqa şyǧyp, Auǧanstandaǧy äielder qūqyǧynyŋ būzyluy turaly aityp bergen.
2023 jyldyŋ şılde aiynda onyŋ atasy auǧan äskeri qyzmetkerlerınen hat alǧan, onda qyzǧa «islamdyq emes qūndylyqtardy» nasihattaǧany üşın «eŋ qataŋ şaralar» qoldanylatyny jazylǧan.
2021 jyly tamyz aiynda Auǧanstandaǧy bilıktı «Taliban» qozǧalysy basyp alǧannan keiın, äielderdıŋ qūqyqtaryn şekteu boiynşa bırqatar qadamdar jasalǧan. Qyrküiek aiynda universitetterdegı studentter üşın erejeler özgertıldı: erler men äielder bölek oqityn bolyp, sabaqtarǧa qataŋ kiım ülgısımen qatysuǧa mäjbür boldy.
2022 jyldyŋ köktemınde radikaldar 12 jasqa tolmaǧan qyzdarǧa mektepte oquyn toqtatuǧa būiryq berdı. Jeltoqsannyŋ ekınşı jartysynda qyzdardyŋ universitetterde oquyn toqtatu turaly jarlyq şyǧardy, al üş ai būryn Auǧanstan universitetterınde qabyldau emtihandary ötkızılgen jäne oqu oryndaryna myŋdaǧan äielder tüsken edı. Sondai-aq, tälıpter auǧan äielderıne ükımettık emes ūiymdarda jūmys ısteuge tyiym saldy.
