Алматы соты 22 жастағы Ауғанстан азаматшасының апелляциялық шағымын қанағаттандырмады. Ол бірнеше айдан бері Қазақстанда босқын мәртебесін алу үшін күресіп жатқан, деп хабарлайды “Адырна” ұлттық порталы Ulysmedia.kz сайтына сілтеп.
Ақпаратқа сәйкес, қызды туған еліне күшпен жіберу мүмкін, өйткені Алматы қаласының Жұмыспен қамту және әлеуметтік бағдарламалар басқармасы оған босқын мәртебесін беру үшін негіз жоқ деп тапты.
“Қыз (мақалада қауіпсіздік мақсатында оның аты өзгертілген) Басқармаға қарсы сот ісін қозғаған, бірақ сот оны қолдамады және 25 ақпанда оның апелляциялық шағымы да қанағаттандырылмады. Енді Ауғанстан азаматшасына Жоғарғы сотқа шағымдану керек”, деп хабарлады оның адвокаты Гүлмира Қуатбекова.
Белгілі болғандай, қыз 2023 жылдың желтоқсанынан бері Қазақстанда тұрып жатыр, медициналық университетте оқыған, бірақ оқуын төлей алмай қалғандықтан оны тастауға мәжбүр болған. Отанында ол әйелдер құқықтарын қорғаумен айналысқан — шетелдік ұйымдармен ынтымақтастықта болып, қыздарға сабақ беріп, Батыс медиаларымен байланысқа шығып, Ауғанстандағы әйелдер құқығының бұзылуы туралы айтып берген.
2023 жылдың шілде айында оның атасы ауған әскери қызметкерлерінен хат алған, онда қызға «исламдық емес құндылықтарды» насихаттағаны үшін «ең қатаң шаралар» қолданылатыны жазылған.
2021 жылы тамыз айында Ауғанстандағы билікті «Талибан» қозғалысы басып алғаннан кейін, әйелдердің құқықтарын шектеу бойынша бірқатар қадамдар жасалған. Қыркүйек айында университеттердегі студенттер үшін ережелер өзгертілді: ерлер мен әйелдер бөлек оқитын болып, сабақтарға қатаң киім үлгісімен қатысуға мәжбүр болды.
2022 жылдың көктемінде радикалдар 12 жасқа толмаған қыздарға мектепте оқуын тоқтатуға бұйрық берді. Желтоқсанның екінші жартысында қыздардың университеттерде оқуын тоқтату туралы жарлық шығарды, ал үш ай бұрын Ауғанстан университеттерінде қабылдау емтихандары өткізілген және оқу орындарына мыңдаған әйелдер түскен еді. Сондай-ақ, тәліптер ауған әйелдеріне үкіметтік емес ұйымдарда жұмыс істеуге тыйым салды.
