Bilim berý ınfraqurylymyn qoldaý qory esebinen 22 myń oqýshy ornyna arnalǵan taǵy 28 jańa mektep salynady. Bul týraly Oqý-aǵartý mınıstrliginiń baspasóz qyzmeti málimdedi, dep habarlaıdy “Adyrna” ulttyq portaly.
Prezıdenttiń tapsyrmasy boıynsha qurylǵan qor jemqorlardan tárkilengen qarajat esebinen tolyqtyrylyp keledi. Onyń negizgi maqsaty bilim berý uıymdary úshin jańa ǵımarattar salý, keńeıtý arqyly apatty mektepter men oryn tapshylyǵyn joıý.
"Memleket balalar úshin qolaıly jaǵdaı jasaýǵa erekshe kóńil bólip keleli. Búgingi tańda 74,4 myń oryndyq 61 mektep paıdalanýǵa berildi, onyń 29-y aýyldyq eldi mekenderde ornalasqan", – dep atap ótti ınfraqurylymdy damytý departamentiniń basqarma basshysy Jaıyq Mahsýtov.
Aqparatqa sáıkes, 2024 jyly 25 mektep salyndy, olardyń basym bóligi Astana qalasynda, jáne Mańǵystaý, Almaty, Jambyl oblystarynda ornalasqan. Barlyq bilim berý uıymdary zamanaýı qural-jabdyqtarmen jabdyqtalǵan.
