Resei ükımetınıŋ ışkı qūjattary jelıge tarap ketken. Onda Mäskeu Batys elderınıŋ Ortalyq Aziiaǧa yqpaly artyp kele jatqanyna alaŋdaityny aitylǧan, dep habarlaidy “Adyrna” ūlttyq portaly.
Būl aqparatty The Financial Times habarlady.
Qūjat 2024 jyldyŋ säuırınde Resei premer-ministrı Mihail Mişustin basşylyq etken strategiialyq sessiiada tanystyrylǧan. Jiynǧa ondaǧan ükımet müşesı men memlekettık korporasiialardyŋ basşylary qatysqan.
Qūjatta Ukrainadaǧy soǧystyŋ Resei men Ortalyq Aziia elderı arasyndaǧy qarym-qatynasqa äserı qarastyrylǧan. Mäskeu Batys sanksiialary Resei men onyŋ serıktesterı arasyndaǧy bailanysty älsıretıp jatqanyn moiyndaidy.
Kreml Euraziialyq sauda blogynyŋ ortalyǧy boludy közdeidı jäne “makroaimaq” qūrudy strategiialyq maqsat retınde qarastyrady. Mäskeu būl aimaqty AQŞ, EO jäne Qytaiǧa qarsy ekonomikalyq bäsekeles küşke ainaldyrǧysy keledı.
Alaida Resei Ortalyq Aziia elderın öz yqpalynda ūstap qaludyŋ oŋai emestıgın tüsınedı. Qūjatta Batys elderı “jaza jäne syiaqy” ädısın qoldanyp, aimaq elderınıŋ Reseige täueldılıgın azaituǧa kömektesıp jatqany jazylǧan.
“Batys elderı būl memleketterge Reseiden täuelsız kölık dälızderı men jahandyq naryqtarǧa qol jetkızuge mümkındık berdı. Sonymen qatar, Reseiden qonys audarǧan biznes pen şeteldık kompaniialardyŋ köşuınen Qazaqstan men basqa elder ekonomikalyq paida körıp otyr,” – delıngen baiandamada.
Qūjatta Qazaqstan erekşe atalǧan. Mäskeu Qazaqstannyŋ Resei-Ukraina soǧysyna qarsy ekenın, Reseidıŋ okkupasiialanǧan aumaqtaryn moiyndamaǧanyn jäne Batys sanksiialaryn saqtauǧa tyrysatynyn atap ötken.
Kreml Ortalyq Aziiamen bailanysyn nyǧaitu üşın “ūzaq merzımdı oiyn” jürgızetının körsetken. Resei aimaq elderımen ortaq tarihty alǧa tartyp, “täuelsızdıgıne qūrmet körsetetının” körsetuge tyrysatyny jazylǧan.
Qūjatta Belarus mysal retınde keltırılgen. Mäskeu būl eldıŋ ekonomikalyq ärtaraptandyruǧa tyrysqanyna qaramastan, aqyrynda Reseimen bırge bolatynyn tüsıngenın körsetedı.
Jelıge taraǧan qūjatta Euraziialyq ekonomikalyq odaqtyŋ (EAEO) “jüielı problemalarǧa” tap bolǧany da atap ötılgen. Olardyŋ qatarynda sanksiialyq täuekelder men tölem jüielerındegı qiyndyqtar bar.
Sonymen qatar, Qazaqstandaǧy alǧaşqy AES qūrylysy Reseidıŋ yqpalyn küşeituge arnalǧan qūraldardyŋ bırı retınde qarastyrylǧan. Qūjatta “Rosatom” būl jobaǧa erekşe qyzyǧuşylyq tanytyp otyr” delıngen.
Al Resei ükımetı The Financial Times-tyŋ būl qūjatqa qatysty sūraǧyna jauap bermegen.
Ūqsas jaŋalyqtar
