Petropavl qalasynda kartopty shekteýli mólsherde satý tártibi engizildi. Endi turǵyndar turaqtandyrý qory pýnktterinen nemese sýpermarketterden bir adamǵa 3 keliden artyq kartop satyp ala almaıdy, dep habarlaıdy "Adyrna" ulttyq portaly KTK-ǵa siltep.
Jergilikti bılik bul shekteýdi alypsatarlyqtyń aldyn alý maqsatynda qabyldaǵanyn málimdedi. Turaqtandyrý qorynyń deregine sáıkes, qorda 1200 tonna kartop saqtalǵan. Qazirgi ýaqytta kartop turaqtandyrý qorynan 97 teńgeden, al sýpermarketterde 110 teńgeden satylýda. Bul baǵalar bazardaǵy baǵamen salystyrǵanda úsh ese arzan.
Osyǵan uqsas shekteý Atyraý qalasynda da engizilgen. Onda da kartopty bir adamǵa 3 keliden artyq satýǵa tyıym salynǵan.
"Bir adamǵa 2-3 keliden kartop beriledi. Sebebi kartopqa suranys óte joǵary, sondyqtan alypsatarlyqqa jol berilmeýi tıis. Bul kartop tapshylyǵyna baılanysty emes", – delingen resmı habarlamada.
Aıta keteıik, buǵan deıin Almaty qalasyndaǵy keı dúkenderde de kartop satylymyna shekteý qoıylǵan.
