Nūrsūltan Mūsaǧaliev Orynbor oblysy ministrınıŋ orynbasary qyzmetıne taǧaiyndaldy, dep habarlaidy "Adyrna" ūlttyq portaly.
Reseidıŋ Ukrainaǧa jasaǧan basqynşylyq soǧysyna qatysqan Nūrsūltan Mūsaǧaliev Orynbor oblysynyŋ öŋırlık jäne aqparattyq saiasat ministrınıŋ orynbasary mındetın atqaruşy bolyp taǧaiyndaldy. Būl turaly oblys gubernatory Denis Pasler habarlady.
Ukraina qauıpsızdık qyzmetınıŋ mälımetınşe, Mūsaǧaliev Resei qaruly küşterınıŋ 76-şy gvardiialyq desanttyq-şabuyldau diviziiasynyŋ 104-polkınde barlau vzvodynyŋ komandirı bolǧan.
Ol Reseidıŋ eŋ joǧary marapattarynyŋ bırı – "Resei batyry" ataǧyn alǧan. Sonymen qatar, oǧan üş "Erlık ordenı" jäne "Otan aldyndaǧy eŋbegı üşın" ordenınıŋ II därejelı medalı tabystalǧan.
Ukrainaǧa basqynşylyq soǧysqa qatysqannan keiın Mūsaǧaliev Resei prezidentı Vladimir Putinnıŋ bastamasymen qūrylǧan "Batyrlar uaqyty" kadrlyq baǧdarlamasy aiasynda taǧylymdamadan ötken.
Gubernator Paslerdıŋ aituynşa, jaŋa qyzmetınde Mūsaǧaliev "arnaiy äskeri operasiia" ardagerlerı men olardyŋ otbasylaryna qoldau körsetumen ainalysatyn qoǧamdyq ūiymdardyŋ jūmysyn üilestıredı.
Ukrainanyŋ qūqyq qorǧau organdary Nūrsūltan Mūsaǧalievtı soǧys zaŋdary men dästürlerın būzdy dep aiyptaidy.
Resmi derekterge süiensek, 2022 jyldyŋ 24 aqpanynda ol Kievke şabuyl jasau üşın Bucha audanyna kelgen. Sol jerde beibıt tūrǧyndarǧa qarsy "tazalau" operasiialaryna qatysqan, al būl äreketter qorqytu jäne qarsylasu qozǧalysyn basu maqsatynda jasalǧan.
Ukraina tergeu oryndary Mūsaǧaliev öz jauyngerlerıne 29 jastaǧy jergılıktı tūrǧyndy ūrlap äketudı būiyrǧanyn mälımdedı.
Ukraina bilıgı Mūsaǧalievtıŋ äskeri qylmystarǧa qatysy baryn atap ötıp, ony halyqaralyq ızdeuge beruı mümkın.
Ūqsas jaŋalyqtar
