Nursultan Musaǵalıev Orynbor oblysy mınıstriniń orynbasary qyzmetine taǵaıyndaldy, dep habarlaıdy "Adyrna" ulttyq portaly.
Reseıdiń Ýkraınaǵa jasaǵan basqynshylyq soǵysyna qatysqan Nursultan Musaǵalıev Orynbor oblysynyń óńirlik jáne aqparattyq saıasat mınıstriniń orynbasary mindetin atqarýshy bolyp taǵaıyndaldy. Bul týraly oblys gýbernatory Denıs Pasler habarlady.
Ýkraına qaýipsizdik qyzmetiniń málimetinshe, Musaǵalıev Reseı qarýly kúshteriniń 76-shy gvardııalyq desanttyq-shabýyldaý dıvızııasynyń 104-polkinde barlaý vzvodynyń komandıri bolǵan.
Ol Reseıdiń eń joǵary marapattarynyń biri – "Reseı batyry" ataǵyn alǵan. Sonymen qatar, oǵan úsh "Erlik ordeni" jáne "Otan aldyndaǵy eńbegi úshin" ordeniniń II dárejeli medali tabystalǵan.
Ýkraınaǵa basqynshylyq soǵysqa qatysqannan keıin Musaǵalıev Reseı prezıdenti Vladımır Pýtınniń bastamasymen qurylǵan "Batyrlar ýaqyty" kadrlyq baǵdarlamasy aıasynda taǵylymdamadan ótken.
Gýbernator Paslerdiń aıtýynsha, jańa qyzmetinde Musaǵalıev "arnaıy áskerı operaııa" ardagerleri men olardyń otbasylaryna qoldaý kórsetýmen aınalysatyn qoǵamdyq uıymdardyń jumysyn úılestiredi.
Ýkraınanyń quqyq qorǵaý organdary Nursultan Musaǵalıevti soǵys zańdary men dástúrlerin buzdy dep aıyptaıdy.
Resmı derekterge súıensek, 2022 jyldyń 24 aqpanynda ol Kıevke shabýyl jasaý úshin Býcha aýdanyna kelgen. Sol jerde beıbit turǵyndarǵa qarsy "tazalaý" operaııalaryna qatysqan, al bul áreketter qorqytý jáne qarsylasý qozǵalysyn basý maqsatynda jasalǵan.
Ýkraına tergeý oryndary Musaǵalıev óz jaýyngerlerine 29 jastaǵy jergilikti turǵyndy urlap áketýdi buıyrǵanyn málimdedi.
Ýkraına bıligi Musaǵalıevtiń áskerı qylmystarǵa qatysy baryn atap ótip, ony halyqaralyq izdeýge berýi múmkin.
