نۇرسۇلتان مۇساعاليەۆ ورىنبور وبلىسى ءمينيسترىنىڭ ورىنباسارى قىزمەتىنە تاعايىندالدى، دەپ حابارلايدى "ادىرنا" ۇلتتىق پورتالى.
رەسەيدىڭ ۋكرايناعا جاساعان باسقىنشىلىق سوعىسىنا قاتىسقان نۇرسۇلتان مۇساعاليەۆ ورىنبور وبلىسىنىڭ وڭىرلىك جانە اقپاراتتىق ساياسات ءمينيسترىنىڭ ورىنباسارى مىندەتىن اتقارۋشى بولىپ تاعايىندالدى. بۇل تۋرالى وبلىس گۋبەرناتورى دەنيس پاسلەر حابارلادى.
ۋكراينا قاۋىپسىزدىك قىزمەتىنىڭ مالىمەتىنشە، مۇساعاليەۆ رەسەي قارۋلى كۇشتەرىنىڭ 76-شى گۆارديالىق دەسانتتىق-شابۋىلداۋ ديۆيزياسىنىڭ 104-پولكىندە بارلاۋ ۆزۆودىنىڭ كومانديرى بولعان.
ول رەسەيدىڭ ەڭ جوعارى ماراپاتتارىنىڭ ءبىرى – "رەسەي باتىرى" اتاعىن العان. سونىمەن قاتار، وعان ءۇش "ەرلىك وردەنى" جانە "وتان الدىنداعى ەڭبەگى ءۇشىن" وردەنىنىڭ II دارەجەلى مەدالى تابىستالعان.
ۋكرايناعا باسقىنشىلىق سوعىسقا قاتىسقاننان كەيىن مۇساعاليەۆ رەسەي پرەزيدەنتى ۆلاديمير ءپۋتيننىڭ باستاماسىمەن قۇرىلعان "باتىرلار ۋاقىتى" كادرلىق باعدارلاماسى اياسىندا تاعىلىمدامادان وتكەن.
گۋبەرناتور پاسلەردىڭ ايتۋىنشا، جاڭا قىزمەتىندە مۇساعاليەۆ "ارنايى اسكەري وپەراتسيا" ارداگەرلەرى مەن ولاردىڭ وتباسىلارىنا قولداۋ كورسەتۋمەن اينالىساتىن قوعامدىق ۇيىمداردىڭ جۇمىسىن ۇيلەستىرەدى.
ۋكراينانىڭ قۇقىق قورعاۋ ورگاندارى نۇرسۇلتان مۇساعاليەۆتى سوعىس زاڭدارى مەن داستۇرلەرىن بۇزدى دەپ ايىپتايدى.
رەسمي دەرەكتەرگە سۇيەنسەك، 2022 جىلدىڭ 24 اقپانىندا ول كيەۆكە شابۋىل جاساۋ ءۇشىن بۋچا اۋدانىنا كەلگەن. سول جەردە بەيبىت تۇرعىندارعا قارسى "تازالاۋ" وپەراتسيالارىنا قاتىسقان، ال بۇل ارەكەتتەر قورقىتۋ جانە قارسىلاسۋ قوزعالىسىن باسۋ ماقساتىندا جاسالعان.
ۋكراينا تەرگەۋ ورىندارى مۇساعاليەۆ ءوز جاۋىنگەرلەرىنە 29 جاستاعى جەرگىلىكتى تۇرعىندى ۇرلاپ اكەتۋدى بۇيىرعانىن مالىمدەدى.
ۋكراينا بيلىگى مۇساعاليەۆتىڭ اسكەري قىلمىستارعا قاتىسى بارىن اتاپ ءوتىپ، ونى حالىقارالىق ىزدەۋگە بەرۋى مۇمكىن.
