Halyqaralyq sóz bostandyǵyn qorǵaý qory jýrnalıst Aısha Qutýbaevaǵa sot ǵımaratynda jasalǵan shabýylǵa baılanysty obektıvti tergeý júrgizýdi talap etti, dep habarlaıdy "Adyrna" ulttyq portaly Ulysmedia.kz-ke siltep.
"Ádil sóz" qory 2025 jyldyń 30 qańtarynda Astana qalasynyń Qylmystyq ister jónindegi aýdanaralyq sotynda jýrnalıst Aısha Qutýbaevaǵa jasalǵan shabýylǵa qatty alańdaýly ekenin málimdedi.
Qor ókilderi bul Qazaqstanda jýrnalısterge jasalǵan alǵashqy shabýyl emes ekenin atap ótti.
Qordyń keltirgen derekterinde, 2024 jyldyń qyrkúıeginde Petropavlda Qazmedia.kz tilshisine polıııa reıdi kezinde mas adam shabýyl jasaǵan. Sot ony usaq buzaqylyq boıynsha kináli dep tanyp, 5 táýlikke qamaýǵa alynǵany kórsetilgen. Sondaı-aq, qarasha aıynda Batys Qazaqstan oblysynda Umarovnews.kz saıtynyń redaktoryn sot zalynda soqqyǵa jyqty. Bul oqıǵa QR Qylmystyq kodeksiniń 109-baby (Uryp-soǵý) boıynsha qaralyp, keıin kináli taraptyń keshirim suraýyna baılanysty is jabylǵany da kórsetilgen.
"Ádil sóz" atap ótkendeı, QR Qylmystyq kodeksiniń 158-baby (Jýrnalıstiń zańdy kásibı qyzmetine kedergi jasaý) sońǵy 15 jylda nebári eki ret sotqa deıin jetken. Osyǵan baılanysty qor QR Ákimshilik quqyqbuzýshylyq týraly kodeksine (QOAP) qosymsha jaýapkershilik engizýdi usyndy.
"Bul ózgeris quqyq buzýshylyqtyń aýyrlyǵyna sáıkes jyldam ári tıimdi sharalar qabyldaýǵa múmkindik beredi", – dep qorytyndylady halyqaralyq uıym.
