Din adamzattyń rýhanı qajettilikteriniń mańyzdy bóligi bolyp tabylady jáne qoǵamda óziniń mánin árdaıym bildiredi. Dinniń adam ómirindegi róli birneshe aspektilerde kórinis tabady: dúnıetanymdyq qyzmeti, rýhanı qundylyqtardy taratýy, jubatýy, otbasy-neke qatynastaryn retteý, sondaı-aq adamdardy biriktirý nemese bólshekteý. Qoǵamdaǵy dinı senimder sońǵy jyldary óskenine baılanysty, dinı saýattylyq máseleleri de ózekti bolyp otyr. Dinı bilimniń jetkiliksizdigi keıde qaýipti nátıjelerge alyp keledi.
Mysaly, keıbir adamdar dinı bilim alý úshin shetelderge baryp, sondaǵy túsinikterdi óz mádenıetimizge sáıkes kelmeıtin túrde túsindirip jatady. Bul, óz kezeginde, jastardyń ulttyq dástúrlerden alshaqtap, sheteldegi dinı aǵymdarǵa tartylýyna sebep bolýda. Mysaly, Sırııaǵa barǵan jastardyń keıin ózderiniń adasqandaryn túsinýi osynyń aıqyn dáleli. Bilim alýdyń mańyzdylyǵy úlken. Islamda bilim alý mindetti dep sanalady, al Muhammed paıǵambar bilim izdeýdi barlyq musylmandarǵa paryz dep aıtqan. Osyǵan baılanysty, ıslam ǵalymdary ártúrli salalarda ǵylymı jetistikterge jetti, din men ǵylymdy qatar alyp júrdi. Bul ustanym búgingi kúnde de ózektiligin joǵaltqan joq.
Qazirgi kezde elimizde dinı bilim alý múmkindikteri kóp. Musylman jastary úshin dinı bilimdi alý úshin oqý oryndary men medreseler bar, sondaı-aq shetelde oqýǵa múmkindik bar. Sonymen qatar, mektepter men joǵary oqý oryndarynda da dintaný pánderi oqytylady. Dinı bilimniń máni tek jastarynyń bolashaǵyna ǵana emes, búkil qoǵamnyń turaqtylyǵy men damýyna da áser etedi. Sondyqtan da ata-analar men muǵalimder balanyń dinı tanymyn durys qalyptastyrýǵa úles qosýy tıis. Olardyń durys baǵytta tárbıelenýi eldiń bolashaǵy úshin mańyzdy.
Taıaqtyń eki ushy bolady demekshi, aqparat aǵyny arasynda ektremıstik aǵymdardyń ıdeıalaryn nasıhattaıtyn toptardyń da bar ekendigin umytpaý kerek. Osy rette dinı ımmýnıtetti qalyptastyrý óte mańyzdy. Kópultty jáne kóp konfessııaly elimizdegi qoǵamdyq kelisim men turaqtylyqty qamtamasyz etýde dinniń alatyn orny aıryqsha, – deıdi dintaný ǵylymdarynyń PhD doktory Balǵabek Myrzabaev
Qoryta aıtqanda, dinniń qoǵamdaǵy orny men rólin durys túsiný úshin dinı bilimniń mańyzy zor. Bul másele tek jekelegen adamnyń ǵana emes, qoǵamnyń da qaýipsizdigi men damýyna áser etedi. Sondyqtan biz dinı saýattylyqty arttyrý úshin barlyq kúsh-jigerimizdi salýymyz qajet.
