Búgin Almaty qalalyq máslıhatynyń kezekten tys XXV sessııasy ótti. Májilis barysynda áleýmettik sala, ınfraqurylym, kásipkerlikti damytý jáne kógaldandyrý máseleleri jan-jaqty qarastyryldy.Qala ákimdigi men máslıhat depýtattary aldaǵy jyldarǵa arnalǵan maqsattar men mindetterdi anyqtap, qarjylyq resýrstardy tıimdi paıdalanýdyń joldaryn talqylady.
Qala ákimniń baıandamasyna súıensek, aldaǵy úsh jylda Almaty bıýdjeti 2,1 trln teńgege jetedi. Bul buryn-sońdy bolmaǵan kórsetkish. Bıýdjet kóleminiń artýy ekonomıkanyń turaqty ósýimen baılanysty. 2024 jyly Almaty ekonomıkasy 5,5%-ǵa ósedi dep kútilse, 2025 jyly bul kórsetkish 6,4%-ǵa jetpek. Mundaı ósimniń arqasynda qala turǵyndarynyń ómir sapasy jaqsaryp, Almaty zamanaýı megapolıske aınalady.
Bıýdjettiń 40%-y áleýmettik salaǵa baǵyttalady. Demek, densaýlyq saqtaý, bilim berý jáne turǵyndardyń ál-aýqatyn jaqsartýǵa erekshe kóńil bólinedi. Sonymen qatar, 455,9 mlrd teńge ınjenerlik jáne kólik ınfraqurylymyn damytýǵa bólinse, qalany kógaldandyrýǵa 170,5 mlrd teńge qarastyrylǵan. Osy qarjynyń arqasynda qalada 1 mıllıon aǵash qamtylyp, jańa sýarý júıeleri ornatylady.
Almatynyń basty maqsaty – zamanaýı ári jaıly qalaǵa aınalý. Muny júzege asyrý úshin kólik júıesin jańǵyrtý, ekologııalyq taza qoǵamdyq kólikterdi engizý jáne jańa joldar salý josparlanyp otyr. 2025 jylǵa qaraı gazben júretin 600 avtobýs pen 100 elektr avtobýsy qala kóshelerine shyǵady.
Máslıhat otyrysynda Almatynyń zamanaýı megapolıske aınalýy úshin naqty qadamdar jasaldy. Qalanyń árbir turǵyny bul ózgeristerdiń oń nátıjesin sezinedi dep kútilýde. Máslıhat depýtattary men qala basshylyǵy aldaǵy úsh jylda barlyq josparlanǵan mindetterdi sapaly oryndaýǵa daıyn ekendikterin bildirdi.
