Birde Tóle bı aýylynda turatyn Pernebaı Júnisbekuly shejireli-kónekóz qarııalardan tómendegideı áńgime estipti:
“ – Kıeli Shý topyraǵynda kindik qany tamǵan Nurmaǵanbet (Balýan Sholaqtyń azan shaqyryp qoıǵan aty) Kókshe óńirinen Sámbet aýylyndaǵy aǵaıyndaryna at aryltyp kelip turýdy umytpapty.
Erterekte irgeles jatqan kórshiles rýdyń bir jigitin Sámbet aýylynyń tentek-esersoqtary ońdyrmaı sabap tastapty. Taıaq jegen jigittiń on-on bes jerles aǵaıyndary atqa qonyp, kútpegen jerden atoılap Sámbet aýylyna basyp kirip, kópshiligin taıaqqa jyǵady. Sol sátte aǵaıyndaryna qydyryp kelgen Balýan Sholaq jasyrynyp tyǵylyp qalypty. Kek alýshylar maqsattaryna jetip, abyr-sabyr basylǵan soń týystarynyń biri:
– Balýan aǵa-aý, munyńyz qalaı? Onshaqty bozókpe jigitten qorqyp buǵyp qalǵanyńyz ne? – depti. Sonda Balýan Sholaq:
– Men olardan seskengen joqpyn, óz kúshimnen qoryqtym. Jasyrynbaǵanda “kózderine qan tolǵan” jigitter maǵan da qol kóteretin edi. Al meniń ashýym qozsa, dúleı kúshpen olardyń eki-úsheýin óltirip qoıýym ǵajap emes edi. Qaıǵyly oqıǵa bolsa, daý-damaı, aıtys-tartys bastalyp, qun tólep áýre-sarsańǵa túsetin edik qoı. Mundaı keleńsizdik bolsa, maǵan renjimegende kimge kiná artar edińder, – depti jaryqtyq Balýan atamyz”, – degendi estip, tań-tamasha qalǵanmyn.
Iá, Qudaıdyń týmysynan jaratqan tańǵajaıyp balýandyǵy men sal-seriliginiń arqasynda Nurmaǵanbet atamyzdyń ataq-dańqy Alashqa keńinen málim. Sondaı-aq Balýan Sholaqtyń tula boıynda kópshilik bile bermeıtindeı darhan júrekti márttigi de jeterlikteı bolǵan eken.
Máken Ýaqtegi, Tóle bı aýyly, Shý aýdany, Jambyl oblysy.
