Aqmola oblysynda respublikalyq «Kıtap oqityn ūlt» jobasyn ıske asyru jönındegı yntymaqtastyq turaly memorandumǧa qol qoiyldy. Qūjatqa oblys äkımdıgı men «Kıtap oqityn ūlt – Chitaiuşaia nasiia» qoǧamdyq qory qol qoiyp, öŋır tūrǧyndary arasynda kıtap oqu mädenietın damytuǧa jäne oqyrmandyq belsendılıktı arttyruǧa baǧyttalǧan özara yntymaqtastyqtyŋ negızın qalady.
Qol qoiu räsımı Dostyq üiınde öttı. Is-şaraǧa memlekettık organdardyŋ, bılım beru jäne mädeniet ūiymdarynyŋ, kıtaphana salasynyŋ, qoǧamdyq bırlestıkterdıŋ, ǧylymi qauymdastyqtyŋ jäne būqaralyq aqparat qūraldarynyŋ ökılderı qatysty.
Aqmola oblysy äkımınıŋ orynbasary Dosūlan Aitbaev jobanyŋ öŋır üşın maŋyzyna toqtalyp, onyŋ oqyrman qoǧamyn qalyptastyrudaǧy rölın erekşe atap öttı.
«Kıtap oqu mädenietın damytu – öŋırımızdıŋ bolaşaǧyna salynǧan maŋyzdy investisiia. Bügın bız memleket, bılım beru jüiesı, kıtaphanalar men qoǧamdyq ūiymdardyŋ küş-jıgerın bırıktırıp, kıtapty balalardyŋ, jastardyŋ jäne jalpy Aqmola oblysy tūrǧyndarynyŋ ömırınıŋ ajyramas bölıgıne ainaldyrudy maqsat etıp otyrmyz», – dedı Dosūlan Aitbaev.
«Kıtap oqityn ūlt – Chitaiuşaia nasiia» qoǧamdyq qorynyŋ atqaruşy direktory Aian Saqoşev jobanyŋ tūjyrymdamasyn tanystyryp, ony jüzege asyru tetıkterıne toqtaldy.
«Bızdıŋ maqsatymyz – kıtap oqudy nasihattaumen ǧana şektelmei, adamdardy kıtap oquǧa, ony talqylauǧa yntalandyratyn jäne oqyrmandyq mädeniettı qalyptastyratyn tūraqty jüie qūru. Aqmola oblysy būl jobanyŋ belsendı qatysuşylarynyŋ bırıne ainalady dep senemın», – dedı Aian Saqoşev.
Kezdesu barysynda ǧylymi jäne sarapşylyq qauymdastyq ökılderınıŋ qatysuymen jobany ıske asyrudyŋ özektı baǧyttary talqylandy.
Ūiymdastyruşylardyŋ mälımetınşe, oblysta «Oqityn mektep» jobasy aiasynda 90 myŋnan astam oquşynyŋ, 6 myŋǧa juyq pedagogtıŋ jäne 3 myŋnan astam ata-ananyŋ qatysuymen 50-den astam ıs-şara ötkızılgen. Öŋır mektepterınde 480-ge juyq kovorking-keŋıstık aşylyp, kıtaphana qorlary 330 myŋnan astam körkem ädebiet danasymen tolyqtyryldy. Sonymen qatar 100 mektep pen 20 kolledjde avtomattandyrylǧan kıtaphanalyq aqparattyq jüie engızıldı.
Memorandum aiasynda taraptar kıtap oqu mädenietın damytuǧa, kıtaphana infraqūrylymyn jetıldıruge, jobany ädıstemelık süiemeldeuge, aǧartuşylyq ıs-şaralar ötkızuge jäne aqparattyq qoldau körsetuge baǧyttalǧan bırlesken jūmystardy jüzege asyrady. Sondai-aq öŋırde jobany üilestıretın arnaiy jobalyq keŋse qūrylatyn bolady.
Qūjatqa Aqmola oblysy äkımınıŋ orynbasary Dosūlan Aitbaev pen «Kıtap oqityn ūlt – Chitaiuşaia nasiia» qoǧamdyq qorynyŋ atqaruşy direktory Aian Saqoşev qol qoidy.
