Türkımenstanda Qazaqstannan tasylǧan mūzdatylǧan et partiialarynan brusellioz tabylǧany aityldy, dep habarlaid "Adyrna" ūlttyq portaly Türkımenstan hronikasy basylymyna sılteme jasap.
Basylym deregınşe, Aqmola oblysynan Türkımenstanǧa mūzdatylǧan et jetkızılgen. Keiın sanitarlyq-epidemiologiialyq saraptama jürgızgen zerthana synamalardan brusellioz anyqtalǧan. Qazaqstan tarapy būl jaǧdai jönınde türkımen ärıptesterıne resmi türde habarlap, importtauşy kompaniianyŋ tölengen qarjyny tolyq qaitaratynyn mälımdegen.
Alǧaşqy partiia Ahal uälaiatyna jetkızılıp, mektepke deiıngı balalar mekemelerı men balalar üilerıne bölıngen. Ekınşı partiia Mary jäne Lebap uälaiattaryndaǧy tūtynuşylar qoǧamynyŋ sauda oryndary arqyly satylǧan. Barlyq et taǧam retınde paidalanylyp qoiǧan.
Türkımenstannyŋ densaulyq saqtau jäne medisinalyq önerkäsıp ministrlıgı būl aqparatty qūpiia ūstap, infeksiialyq auruhanalardyŋ bölımşelerın tekserudı jäne qajet bolǧan jaǧdaida nauqastardy oqşaulaudy tapsyrǧan.
