Aýǵanstanmen shekaradaǵy Tájikstandaǵy qytaılyq kásiporynnyń lagerine shabýyl jasaý saldarynan Qytaı Halyq Respýblıkasynyń bir azamaty qaza taýyp, taǵy tórteýi jaraqat aldy, dep habarlaıdy "Adyrna" ulttyq portaly fergana agency-ǵa silteme jasap.
Bul týraly Qytaıdyń Syrtqy ister mınıstrligi habarlaǵan.
Oqıǵa 18 qarashaǵa qaraǵan túni boldy. Lager Aýǵanstanmen shekaralas aımaqta ornalasqan. Shabýyldaýshylardyń kim ekeni jáne olardyń maqsattary áli anyqtalmady.
Pekın bul shabýyldy qatań aıyptap, zardap shekkenderdiń otbasylaryna kóńil aıtty. Qytaıdyń Dýshanbe qalasyndaǵy elshiligi oqıǵa bolǵan aımaqqa kómek kórsetý úshin jumys tobyn jiberdi.
Qytaı elshisi tájik bıligin osy oqıǵany muqııat tergeýge shaqyrdy.
QHR-dyń Syrtqy ister mınıstrligi Qytaı azamattary men shekara mańyndaǵy kompanııalarǵa, ásirese tájik-aýǵan shekarasyndaǵy kúrdeli jaǵdaıdy eskere otyryp, qaýipsizdikke asa nazar aýdarý qajettigin eskertti. Bul shekaranyń uzyndyǵy 1350 km quraıdy.
«Azııa-Plıýs» basylymynyń habarlaýynsha, oqıǵa Tájikstannyń Shamsıddın Shohın aýdanynda, tájik-aýǵan shekarasynda bolǵan. Bul ýchaskeniń uzyndyǵy 10 shaqyrymnan asady jáne ol eń qaýipti aımaqtardyń biri bolyp sanalady. Taýly relef pen ormandy jerlerdiń saldarynan ony patrýldeý qıyn. Qylmyskerlerdiń jasyrynýyna múmkindik bar. Sondyqtan bul aımaq kóbinese aýǵandyq esirtki tasymaldaýshylardyń Tájikstan aýmaǵyna esirtki zattaryn kontrabandalyq jolmen ótkizý úshin paıdalanylady. Buryn bul jerde adamdardy kepilge alý jáne jergilikti turǵyndar men shekarashylarǵa shabýyl jasaý oqıǵalary birneshe ret tirkelgen. Alaıda bul aýdanda Qytaı azamattaryna shabýyl alǵash ret boldy.
Tájikstanda qytaılyq kompanııalar paıdaly qazbalardy, sonyń ishinde altyndy óndirýge belsendi qatysady. Respýblıkada tolyq nemese ishinara qytaılyq kapıtalmen jumys isteıtin birneshe altyn óndirý kásiporny bar.
