اۋعانستانمەن شەكاراداعى تاجىكستانداعى قىتايلىق كاسىپورىننىڭ لاگەرىنە شابۋىل جاساۋ سالدارىنان قىتاي حالىق رەسپۋبليكاسىنىڭ ءبىر ازاماتى قازا تاۋىپ، تاعى تورتەۋى جاراقات الدى، دەپ حابارلايدى "ادىرنا" ۇلتتىق پورتالى fergana agency-عا سىلتەمە جاساپ.
بۇل تۋرالى قىتايدىڭ سىرتقى ىستەر مينيسترلىگى حابارلاعان.
وقيعا 18 قاراشاعا قاراعان ءتۇنى بولدى. لاگەر اۋعانستانمەن شەكارالاس ايماقتا ورنالاسقان. شابۋىلداۋشىلاردىڭ كىم ەكەنى جانە ولاردىڭ ماقساتتارى ءالى انىقتالمادى.
پەكين بۇل شابۋىلدى قاتاڭ ايىپتاپ، زارداپ شەككەندەردىڭ وتباسىلارىنا كوڭىل ايتتى. قىتايدىڭ دۋشانبە قالاسىنداعى ەلشىلىگى وقيعا بولعان ايماققا كومەك كورسەتۋ ءۇشىن جۇمىس توبىن جىبەردى.
قىتاي ەلشىسى تاجىك بيلىگىن وسى وقيعانى مۇقيات تەرگەۋگە شاقىردى.
قحر-دىڭ سىرتقى ىستەر مينيسترلىگى قىتاي ازاماتتارى مەن شەكارا ماڭىنداعى كومپانيالارعا، اسىرەسە تاجىك-اۋعان شەكاراسىنداعى كۇردەلى جاعدايدى ەسكەرە وتىرىپ، قاۋىپسىزدىككە اسا نازار اۋدارۋ قاجەتتىگىن ەسكەرتتى. بۇل شەكارانىڭ ۇزىندىعى 1350 كم قۇرايدى.
«ازيا-پليۋس» باسىلىمىنىڭ حابارلاۋىنشا، وقيعا تاجىكستاننىڭ شامسيددين شوحين اۋدانىندا، تاجىك-اۋعان شەكاراسىندا بولعان. بۇل ۋچاسكەنىڭ ۇزىندىعى 10 شاقىرىمنان اسادى جانە ول ەڭ قاۋىپتى ايماقتاردىڭ ءبىرى بولىپ سانالادى. تاۋلى رەلەف پەن ورماندى جەرلەردىڭ سالدارىنان ونى پاترۋلدەۋ قيىن. قىلمىسكەرلەردىڭ جاسىرىنۋىنا مۇمكىندىك بار. سوندىقتان بۇل ايماق كوبىنەسە اۋعاندىق ەسىرتكى تاسىمالداۋشىلاردىڭ تاجىكستان اۋماعىنا ەسىرتكى زاتتارىن كونتراباندالىق جولمەن وتكىزۋ ءۇشىن پايدالانىلادى. بۇرىن بۇل جەردە ادامداردى كەپىلگە الۋ جانە جەرگىلىكتى تۇرعىندار مەن شەكاراشىلارعا شابۋىل جاساۋ وقيعالارى بىرنەشە رەت تىركەلگەن. الايدا بۇل اۋداندا قىتاي ازاماتتارىنا شابۋىل العاش رەت بولدى.
تاجىكستاندا قىتايلىق كومپانيالار پايدالى قازبالاردى، سونىڭ ىشىندە التىندى وندىرۋگە بەلسەندى قاتىسادى. رەسپۋبليكادا تولىق نەمەسە ءىشىنارا قىتايلىق كاپيتالمەن جۇمىس ىستەيتىن بىرنەشە التىن ءوندىرۋ كاسىپورنى بار.
