«Taza Qazaqstan» ekologiialyq aksiiasy aiasynda elımızdıŋ barlyq öŋırınde bır mezgılde «Tülekterdıŋ aǧaş eguı» eko-chellendjı öttı. Izgı bastama jas ūrpaqtyŋ tabiǧatqa degen jauapkerşılıgın arttyruǧa baǧyttalǧan keŋ auqymdy ekologiialyq qozǧalysqa ainaldy.
Qazaqstannyŋ barlyq bılım beru ūiymdarynda «Eŋbekqorlyq jäne käsıbi bılıktılık aiy» jariialanyp, onyŋ aiasynda «Halyqaralyq balalar kıtaby künı», «Halyqaralyq eskertkışter men tarihi oryndardy qorǧau künı», «Ūlttyq kıtap künı» jäne basqa da bırqatar respublikalyq aksiialar ūiymdastyryldy. Būl bastama öskeleŋ ūrpaqty kıtap oquǧa, qaiyrymdy ısterge bauluǧa, sondai-aq qorşaǧan ortaǧa degen qamqorlyq pen ekologiialyq mädeniettılıktı qalyptastyruǧa baǧyttalǧan. Sonymen qatar «Tabiǧatqa qamqorlyq jasaimyz» aksiiasy aiasynda mektep aumaqtary men qoǧamdyq keŋıstıkterde tazalyq jūmystaryn jürgızu qolǧa alynuda.
Aǧaş otyrǧyzu eko-chellendjı dästürlı şaraǧa ainaldy. Biyl ol törtınşı jyl qatarynan elımızdıŋ barlyq bılım beru ūiymdarynda tūraqty türde ötkızılude.
Biylǧy jyly eko-chellendjge 9 jäne 11 synyptardyŋ 100 myŋnan astam oquşysy qatysty. Olar mektep aumaqtarynda, saiabaqtar men qoǧamdyq keŋıstıkterde aǧaş otyrǧyzyp, eldı mekenderdı kögaldandyruǧa öz ülesterın qosty.
Aita keteiık, osydan bır apta būryn «Keleşek mektepterı» jobasynyŋ oquşylary da senbılıkke qatysyp, qorşaǧan ortany qorǧau ısıne belsendı üles qosqan bolatyn.
