Aq sandyqty ashsań, kók sandyq, kógin ashsań, sary sandyq, onyń ishinen de túsi bólek kishigirim sandyqshalar shyǵa beretin qazaqtyń ertegisi bar emes pe edi? Sosyn álgi orystyń matreshki qýyrshaǵyna qarańyzshy...
Nazarbaev dıktatýrasy memleketti basqarýdyń sondaı pıramıdasyn túzdi. Eń bıiktegi el prezıdenti men áldebir eleýsiz mekemedegi basshyny salystyryp qarasań, kólemi sáıkes kelmese de beıne-bederi uqsas, tipti toǵysharlyq túr-sıpaty, tonaýshylyq is-áreketi bir-birinen aınymaıtyn.
Eń aqyry Jazýshylar odaǵynyń tóraǵasy da ózin ergejeıli- nazarbaevsha ustaıtyn, qazirgiler Toqaevtyń bir túrimin dep oılaıtyn bolǵan-aý!..
Qoǵamdyq uıym degen aty ǵana ǵoı, shyndyǵynda JO-nyń zaty - prezıdentti qoldap-qýattaıtyn bıliktiń bir tarmaǵy. Qoldamaı kórsin, shómishten qaǵyp, shólge tentiretip jiberedi!
Sońǵy kezde odaǵymyz ulttyq qaýipsizdik komıtetiniń bir bólimine aınalyp ketkendeı de áser bar. Jybyr-jybyr bir tirlikter jasalyp jatqandaı, tegi, onyń astaryn basshylar ǵana biledi, basqalardyń (múshelerdiń) qatysy joqtaı. Endi ne maqsatta ekeni túsiniksiz kadrlar sapyrylysy bastalǵan sekildi. Dáýletkereı daýy búgin shyǵyp jatyr ǵoı, onyń mán-jaıynan beıhabarmyz, sondyqtan tórelik aıtýdan da aýlaqpyz. Gáp - basqada, áride.
Qalyń qaýym úlken úmit kútip, sezde hatshylar quramyna májbúrlegendeı qylyp engizgen Nurjan Qýantaıdyń budan biraz buryn ún-túnsiz ketip qalǵanyn (ketirilgenin?) estip, tań qaldym. Oý, biz náǵyp bilmeı qaldyq?! "Qazaq ádebıeti" gazeti men "Juldyz" jýrnalynyń redaktorlary aýystyrylyp, kreslo almasqanda qandaı qısyn bar?
Jalpy, odaq basshylarynyń esebin tyńdaıtyn kez keldi.
R.S. "Tık-tokta" bir orys aıtyp otyr: "Biz Otan degendi bılik dep túsinemiz. Bıliktegiler de solaı oılaıdy. Joq, olaı emes. Bılik erteń ketedi, basshylar ornynan túsedi, óledi, Otan qalady..." - dep.
Já, biz Odaq degendi qalaı túsinemiz?
Bolat Jetekbaı
