Elimizde Respýblıka kúni Ulttyq mereke retinde atap ótilip kele jatqan jyldardan beri birqatar jańa dástúrler qalyptasýda. Olardyń biri – kásibı merekelerde túrli sala mamandaryna memlekettik nagradalar tabystaý. Bul tájirıbe eńbek adamdarynyń mártebesin kóterý jáne olardyń qoǵamdaǵy úlesin moıyndaý maqsatynda engizildi.
Degenmen, keıbir azamattar sońǵy jyldary marapattardyń tym kóp berilip jatqanyn alǵa tartyp, syn pikir bildirýde. «Qazaqstan» telearnasynyń «Bas taqyryp» baǵdarlamasyna suhbat bergen Memlekettik keńesshi Erlan Qarın túrli saýaldarǵa jaýap berdi.
Prezıdent Qasym-Jomart Toqaev eńbek adamynyń bedelin arttyrýdyń mańyzdylyǵyn birneshe ret atap ótti. Onyń aıtýynsha, memlekettik nagradalar arqyly qoǵamda eńbekqorlyq pen kásibılikke degen qurmet qalyptasady. Bıylǵy marapattardyń bir ereksheligi – kásibı merekelerdi joǵary deńgeıde atap ótý dástúriniń bastalýy.
«Bıyl biz kásibı merekelerdi joǵary deńgeıde atap ótýdi dástúrge engizdik. Ózderińiz baıqaǵan bolarsyzdar, bıyldan bastap óner qaıratkerleriniń, jýrnalısterdiń, kenshiler men munaıshylardyń jáne ustazdardyń kásibı merekesinde osy mamandyq ıeleriniń eń úzdikterin Aqordada resmı túrde qabyldap, Prezıdent óz qolymen olarǵa memlekettik nagradalar tapsyrǵan bolatyn. Syrttan «osyndaı jıilep ketti» degen pikir qalyptasýy múmkin. Shyn máninde olaı emes. Bul jerdegi basty maqsat – Prezıdentimiz Qasym-Jomart Kemeluly Toqaevtyń burynnan aıtyp júrgen «eńbek adamdarynyń mártebesin arttyrý, eń birinshi eńbek adamdaryna laıyqty qurmet kórsetý. Negizgi maqsat – memlekettik nagradalar tapsyrýda qarapaıym eńbek adamdarynyń mártebesin arttyrý, olarǵa qurmet kórsetý.» - dedi Erlan Qarın.
Osy oraıda Memlekettik keńesshi bıyl marapat ıe bolǵandardyń qatarynda túrli salalardaǵy eńbek dınastııalarynyń ókilderi bolǵanyna asa nazar aýdardy. Mysaly, Respýblıka kúninde memlekettik nagradalar tapsyrylǵandardyń qatarynda 450-ge jýyǵy ártúrli óndiriste, zaýytta, fabrıkada, kásiporyndarda jumys istep júrgen qarapaıym jumysshy mamandar. Odan basqa 100-den asa muǵalim, ǵylym, salasynyń ókilderi bar:
«Bıyl Aqordaǵa shaqyrylyp, marapat tapsyrylǵandardyń qatarynda temirjol salasyndaǵy ótili 800 jyldan asatyn eńbek dınastııasynyń ókilderi boldy. Ustazdar kúninde Memleket basshysy elimizdegi úzdik ustazdardy arnaıy shaqyryp, «Qazaqstan Respýblıkasynyń Eńbek sińirgen ustazy» degen ataqty óz qolymen tapsyrǵan bolatyn. Bul da qoǵamda ustazdardyń, muǵalimderdiń abyroıyn, mártebesin arttyrý maqsatynda jasalyp otyr».
Keıbir synshylar marapattardyń tym kóp ekenin aıtyp jatsa da, bul marapattar jumysshylar men qarapaıym eńbek adamdarynyń eńbegin eleý maqsatyna negizdelgen.
Memlekettik marapattardyń jıi berilýi, eń aldymen, eńbekke qurmet kórsetý jáne qoǵamdaǵy mańyzdy mamandyqtardyń rólin arttyrý úshin jasalyp otyr. Bul sharalar marapat ıelerin yntalandyrýmen qatar, jalpy qoǵamnyń qundylyqtaryna oń áser etedi. Alaıda, mundaı marapattardyń ádil ári negizdi berilýin baqylaý mańyzdy, sebebi qoǵamnyń senimi – eń basty faktor.
