«Qaısar» kapıtany Maqsat Baıjanov Mladenov pen Dosmambetov turǵanda «Qaısarǵa» oralmaımyn deıdi.
Osy jaqynda ǵana aqparat aǵynynda «Qaısar» fýtbol komandasynyń kapıtany klýbpen kelisim-shartty úzgeni jaıynda habarlama shyqty. «Qaısar» óz alańynda «Aqtóbege» 0:3 jeńilip, jergilikti jankúıer aldynda jerge qarady. Onyń aldynda ǵana «dala qasqyrlary» Ǵanı Muratbev atyndaǵy stadıonda «Jetisýǵa» jeńilip, jankúıer qaýym narazylyq aıtty. Osy nátıjelerden keıin bas bapker Stoıcho Mladenov pen klýb basshysy Serik Dosmambetovtyń kinálini taýyp, kapıtandy klýbtan shyǵarýdy jón sanapty.
Árıne, úsh oıyn qatarynan jeńilis tapqan «Qaısar» komandasynyń nátıjesine birinshi kezekte bas bapker Mladenov jaýap berýi tıis. Alaıda, bolgarııalyq bapker basshylyqtyń aldyn orap, qyzmetin saqtaý úshin komandadan ózine unamaǵan oıynshylardy kezegimen ketirip otyrdy. Aldymen Marat Haırýllın, keıinnen Bratıslav Pýnosheva, sosyn mine, kapıtan Maqsat Baıjanovqa da kelip jetti.
Mán-jaıdy bilý úshin biz Maqsattyń ózine habarlasyp, bir aýyz pikirin bildik.
- Sońǵy kezderi komandamyz jeńilip, jankúıer aldynda uıatqa qalyp júrdi. Biraq, nátıjege birinshi kezekte jaýap beretin adam – bas bapker. Alaıda, Stoıcho Mladenov meniń ústimnen raport jazyp, «sporttyq talaptaryn túsirip jiberdi» dep, basshylyqqa jetkizgen. Basshylyqtan Serik Dosmambetov oǵan qol qoıyp, bar kináni maǵan jaýyp otyr. Sosyn, «Baıqońyr» komandasyna aýystyryp, meni poezben Semeıge birinshi-lıga oıynyna barýymdy talap etti. Men árıne, mundaı jaǵdaılarǵa múlde qarsy boldym da, klýbtan «óz erkimmen» ketýdi jón sanadym.
- Sonda komandanyń nashar nátıjelerine kapıtan kináli me?
- Bul komandada menen basqa taǵy 3 kapıtan bar. Men qansha klýbta fýtbol oınadym, biraq bir komandada 4 kapıtan bolýyn birinshi kórýim. Ujym ishindegi atmosferanyń durys bolmaýy da osydan.
- Maqsat, Siz «Qaısar» fýtbol klýbynyń túlegisiz, qanshama jyldar osy komanda úshin ter tóktińiz. Jankúıer qaýym Baıjanov «Qaısarǵa» kelip sporttyq ǵumyryn aıaqtap, qoshtasý matchyn Qyzyordada ótkizedi dep júr edi? Endi qandaı josparyńyz bar?
- Iá, ras aıtasyz. Men Qazaqstannyń kóptegen klýbtarynda oınadym. Biraq, ótken jyly ózimniń týǵan jerimniń komandasy dep «Qaısarǵa» keldim. Bul meniń óz úıim. Degenmen mynda maǵan jasalynyp otyrǵan qastandyqtardan keıin kóńilim qalyp otyr. Endi osy maýsym aıaqtalǵan soń ózge komandaǵa aýysamyn.
- Kóptegen fýtbolshylar ózi oınap bastaǵan klýbtaryna kelip qoshtasý matchyn jasap jatady ǵoı. Siz bálkim «Qaısarǵa» qaıtyp keletin de shyǵarsyz?
- Álbette, qaıtyp kelýim múmkin. Biraq, bapker Stoıcho Mladenov bolyp, klýbta Serik Dosmambetov qyzmet etip jatsa men «Qaısar» komandasyna múlde kelmeımin. Men ondaı adamdarmen bir klýbta bolǵym kelmeıdi.
Qyzylorda fýtbol mektebiniń túlegi Maqsat Baıjanov fýtboldan Qazaqstannyń eki dúrkin chempıony. Ulttyq qurama sapynda talaı goldar salyp, el abyroıyn asqaqtatty. Ol ortalyq alańda oıqastap «Shahter» komandasymen birge Eýrokýbok oıyndarynda jarqyldady. Maqsat Baıjanovtyń Albanııada «Skenderbeý» qaqpasyna soqqan golynan keıin qaraǵandynyń «Shahteri» qazaq fýtbolynyń tarıhynda tuńǵysh ret Eýropa lıgasynyń toptyq kezeńine ótken edi. «Qaısar» sapynda 210 oıyn ótkizip, 26 gol salsa, jalpy birinshilikte 424 oıyn ótkizip, 44 goldyń avtory atandy. Osynshama eńbegi sińgen Maqsat Baıjanovtyń «Qaısar» komandasynan osylaısha qıyn jaǵdaıda ketýi qalyń jankúıerdiń kóńiline batqany ras. Áleýmettik jelide óz pikirin bildirip, «Maqsat Baıjanovty qurmettep, shapan jaýyp shyǵaryp sala da almadyq-aý» dep jazyp jatqandar sany jeterlik. Álbette, Andreı Fınonchenko «Shahter» úshin, Nurbol Jumasqalıev «Tobyl» úshin qandaı fýtbolshy bolsa Maqsat Baıjanov ta «Qaısar» úshin sondaı aıaqdopshy ekeni daýsyz. Sondyqtan da, bul jaǵdaıdyń barlyǵy birinshi kezekte jergilikti fýtbol klýbynyń basshylyǵyna syn ekeni anyq. Ermuhamed Máýlen
Ermuhamed Máýlen
inbusiness.kz
