Búgin QR Májilisiniń depýtaty, aqyn Qazybek Isa «Facebook» áleýmettik jelisindegi jeke paraqshasynda «Mádenıetke mádenıetti biletin basshy kerek» degen atpen bir top qoǵam qaıratkerleriniń Ashyq hatyn jarııalady, dep habarlaıdy «Adyrna» ulttyq portaly.
«Keshe 12 qarashada eki Eńbek Eri - Asanáli Áshimov pen Dýlat Isabekov bastaǵan, Halyq ártisteri men Halyq jazýshylary qostaǵan áıgili mádenıet qaıratkerleri kıno salasyndaǵy qalyptasqan aýyr ahýalǵa narazylyq bildirip, QR Prezıdenti Q.Toqaevtan jaǵdaıdy baqylaýǵa alýdy surap, Ashyq hat jazdy. «Mádenıetke mádenıetti biletin basshy kerek!» - dep málimdedi óner tarlandary», - dep jazyp Qazybek Isa Ashyq hattyń tolyq mátinin jarııalady.
Ashyq hat QR Prezıdenti Qasym-Jomart Toqaevqa, Úkimet basshysy Oljas Bektenovke jáne Qazaqstan Parlamentiniń qos palatasyndaǵy depýtattarǵa baǵyttalalǵan.
Al oǵan qol qoıýshylar retinde Asanáli Áshimov, Dýlat Isabekov, Nurjuman Yqtymbaev, Smaǵul Elýbaı, Doshan Joljaqsynov, Talǵat Temenov, Qanat Tórebaı kórsetilgen.
«Biz, Qazaqstannyń mádenıet jáne óner qaıratkerleri osy hat arqyly otandyq kınematografııa salasynda qalyptasqan jaǵdaıǵa qatty alańdaýshylyq tanytyp otyrmyz. Sońǵy jyldary kıno salasynda bitpeıtin janjaldar kóbeıip ketti, atap aıtqanda, kıno óndirisine jaýapty oryndarda bul salaǵa qatysy joq bógde adamdar otyr, jemqorlyq jaılaǵan kınoǵa bólingen mıllıardtaǵan teńge talan-tarajǵa salynyp, naǵyz kınogerlerdiń sózin eshkim tyńdap jatqan joq. Bul saladaǵy degradaııany toqtatpasa, jaǵdaı qıyndaıtyn túri bar. Munyń bári búkil kıno mamandardyń alańdaýshylyǵyn týǵyzdy. Mádenıet mınıstrligi qazaq kınosyndaǵy jaǵdaıdy rettemek túgili, basyn alyp qashyp otyr. Jaýapty oryndarǵa jazylǵan hattar men shaǵymdarǵa máseleni esh zerttemesten birsydyrǵy jaýaptar ǵana beriledi. Mádenıet salasyna mádenıetti biletin basshy kerek ekeni kún saıyn sezilýde. Sol sebepti biz, kınogerler otandyq kıno salasyndaǵy qordalanǵan problemalardy sheshý joldaryn talap etip, bılikke qaırylýǵa májbúrmiz», - degen hat ıeleri.
Olar Qazaqstan prezıdentin Sh. Aımanov atyndaǵy «Qazaqfılm» kınostýdııasyna shaqyryp, sonymen qatar kınogerlermen tikeleı kezdesý ótkizýdi surap otyr.
Al Ashyq hatqa qol qoıdy degen Qazaqstannyń Eńbek Eri Asanáli Áshimovke eshqandaı hatqa qol qoımadym deıdi.
«Men eshqandaı Ashyq hatqa qol qoıǵan joqpyn. Tek mınıstrdiń qabyldaýyna jazylýdy ótinip, hat joldaǵan bolatynbyz. Al qazirgi mádenıet mınıstrligine kóńilim tolady. Mınıstrliktiń jumysyna qarsylyq bilidiretindeı esh hatqa qol qoımadym», - dedi Asanáli Áshimov.
Májilis depýtaty Qazybek Isa búgin taǵy «Facebook» jelisinde Úkimet basshysy Oljas Bektenovtiń atyna joldaǵan depýtattyq saýalyn jarııalady. Onda elimizdegi mádenıet salasyndaǵy úzdiksiz jalǵasyp jatqan keleńsizdikterge, ulttyq kınodaǵy aýyr ahýalǵa eń aldymen mádenıetten habarsyz mádenıet basshylary jaýapty ekenin málimdep, úkimet basshysynan shuǵyl shara qoldanýdy talap etken.
Maksım Rojın mınıstrdiń jumysyn oń qaraıtynyn, júıeli jumys jasalyp jatqanyn aıtty.
«Depýtattyq saýal kezinde men suhbat (ıntervıý) berý úshin syrtqa shyǵyp kettim. Depýtattyq saýaldy tyńdaǵan joqpyn. Ol týraly keıin, jarııalanǵan soń ǵana bildim. Jalpy mınıstrdiń jumysyna oń qaraımyn. Túsindire keteıin: Mınıstrdiń bul pozıııaǵa alǵashqy kelgen kezinde de, ekinshi taǵaıyndalǵan kezinde de balalarǵa arnalǵan kontentti jalpy memlekettik tilge kóshirý boıynsha júıeli jumys bastaldy. Mınıstrlik balalarǵa arnalǵan beıne jáne baspa kontentimen, BAQ-tarmen júıeli túrde aınalysa bastady. Halyqaralyq Nickelodeon HD, TiJi balalar arnalary bizdiń balalarymyz úshin qazaq tilinde sóıleı bastady, bul jumys birneshe jyldan beri Aıda Balaevanyń usynysy men jeke bastamasymen júzege asyrylyp keledi. Men úshin bul mınıstrlik jetekshilik etetin mańyzdy salalardyń biri», - dedi Maksım Rojın.
Bir nazar aýdararlyǵy – atalǵan hatqa qoldap qol qoıdy degen Májilis depýtattarynyń keıbiri keıin tizimnen alynyp tastaldy. Áýelgi tizimde esimderi kórsetilgen Danııa Espaeva men Maksım Rojın jáne taǵy basqa depýtattar keıin qol qoıýshylar qatarynan tabylmady. Osy jaǵdaı mádenıet mınıstrine qarsy negizsiz shabýyl bastaldy ma degen suraq týǵyzady. Depýtattar men laýazymdy tulǵalardyń atyn ruqsatsyz paıdalanǵan Májilis depýtaty Qazybek Isa bul áreketi arqyly halyqty shatastyryp jatqandaı kórinedi. Mundaı shatastyrý depýtattyq mansaptaǵy tulǵaǵa syn emes pe eken?
