بۇگىن قر ءماجىلىسىنىڭ دەپۋتاتى، اقىن قازىبەك يسا «Facebook» الەۋمەتتىك جەلىسىندەگى جەكە پاراقشاسىندا «مادەنيەتكە مادەنيەتتى بىلەتىن باسشى كەرەك» دەگەن اتپەن ءبىر توپ قوعام قايراتكەرلەرىنىڭ اشىق حاتىن جاريالادى، دەپ حابارلايدى «ادىرنا» ۇلتتىق پورتالى.
«كەشە 12 قاراشادا ەكى ەڭبەك ەرى - ءاسانالى ءاشىموۆ پەن دۋلات يسابەكوۆ باستاعان، حالىق ارتىستەرى مەن حالىق جازۋشىلارى قوستاعان ايگىلى مادەنيەت قايراتكەرلەرى كينو سالاسىنداعى قالىپتاسقان اۋىر احۋالعا نارازىلىق ءبىلدىرىپ، قر پرەزيدەنتى ق.توقاەۆتان جاعدايدى باقىلاۋعا الۋدى سۇراپ، اشىق حات جازدى. «مادەنيەتكە مادەنيەتتى بىلەتىن باسشى كەرەك!» - دەپ مالىمدەدى ونەر تارلاندارى»، - دەپ جازىپ قازىبەك يسا اشىق حاتتىڭ تولىق ءماتىنىن جاريالادى.
اشىق حات قر پرەزيدەنتى قاسىم-جومارت توقاەۆقا، ۇكىمەت باسشىسى ولجاس بەكتەنوۆكە جانە قازاقستان پارلامەنتىنىڭ قوس پالاتاسىنداعى دەپۋتاتتارعا باعىتتالالعان.
ال وعان قول قويۋشىلار رەتىندە ءاسانالى ءاشىموۆ، دۋلات يسابەكوۆ، نۇرجۇمان ىقتىمباەۆ، سماعۇل ەلۋباي، دوسحان جولجاقسىنوۆ، تالعات تەمەنوۆ، قانات تورەباي كورسەتىلگەن.
«ءبىز، قازاقستاننىڭ مادەنيەت جانە ونەر قايراتكەرلەرى وسى حات ارقىلى وتاندىق كينەماتوگرافيا سالاسىندا قالىپتاسقان جاعدايعا قاتتى الاڭداۋشىلىق تانىتىپ وتىرمىز. سوڭعى جىلدارى كينو سالاسىندا بىتپەيتىن جانجالدار كوبەيىپ كەتتى، اتاپ ايتقاندا، كينو وندىرىسىنە جاۋاپتى ورىنداردا بۇل سالاعا قاتىسى جوق بوگدە ادامدار وتىر، جەمقورلىق جايلاعان كينوعا بولىنگەن ميللياردتاعان تەڭگە تالان-تاراجعا سالىنىپ، ناعىز كينوگەرلەردىڭ ءسوزىن ەشكىم تىڭداپ جاتقان جوق. بۇل سالاداعى دەگراداتسيانى توقتاتپاسا، جاعداي قيىندايتىن ءتۇرى بار. مۇنىڭ ءبارى بۇكىل كينو مامانداردىڭ الاڭداۋشىلىعىن تۋعىزدى. مادەنيەت مينيسترلىگى قازاق كينوسىنداعى جاعدايدى رەتتەمەك تۇگىلى، باسىن الىپ قاشىپ وتىر. جاۋاپتى ورىندارعا جازىلعان حاتتار مەن شاعىمدارعا ماسەلەنى ەش زەرتتەمەستەن بىرسىدىرعى جاۋاپتار عانا بەرىلەدى. مادەنيەت سالاسىنا مادەنيەتتى بىلەتىن باسشى كەرەك ەكەنى كۇن سايىن سەزىلۋدە. سول سەبەپتى ءبىز، كينوگەرلەر وتاندىق كينو سالاسىنداعى قوردالانعان پروبلەمالاردى شەشۋ جولدارىن تالاپ ەتىپ، بيلىككە قايرىلۋعا ءماجبۇرمىز»، - دەگەن حات يەلەرى.
ولار قازاقستان پرەزيدەنتىن ش. ايمانوۆ اتىنداعى «قازاقفيلم» كينوستۋدياسىنا شاقىرىپ، سونىمەن قاتار كينوگەرلەرمەن تىكەلەي كەزدەسۋ وتكىزۋدى سۇراپ وتىر.
ال اشىق حاتقا قول قويدى دەگەن قازاقستاننىڭ ەڭبەك ەرى ءاسانالى اشىموۆكە ەشقانداي حاتقا قول قويمادىم دەيدى.
«مەن ەشقانداي اشىق حاتقا قول قويعان جوقپىن. تەك ءمينيستردىڭ قابىلداۋىنا جازىلۋدى ءوتىنىپ، حات جولداعان بولاتىنبىز. ال قازىرگى مادەنيەت مينيسترلىگىنە كوڭىلىم تولادى. مينيسترلىكتىڭ جۇمىسىنا قارسىلىق بىلىدىرەتىندەي ەش حاتقا قول قويمادىم»، - دەدى ءاسانالى ءاشىموۆ.
ءماجىلىس دەپۋتاتى قازىبەك يسا بۇگىن تاعى «Facebook» جەلىسىندە ۇكىمەت باسشىسى ولجاس بەكتەنوۆتىڭ اتىنا جولداعان دەپۋتاتتىق ساۋالىن جاريالادى. وندا ەلىمىزدەگى مادەنيەت سالاسىنداعى ۇزدىكسىز جالعاسىپ جاتقان كەلەڭسىزدىكتەرگە، ۇلتتىق كينوداعى اۋىر احۋالعا ەڭ الدىمەن مادەنيەتتەن حابارسىز مادەنيەت باسشىلارى جاۋاپتى ەكەنىن مالىمدەپ، ۇكىمەت باسشىسىنان شۇعىل شارا قولدانۋدى تالاپ ەتكەن.
ماكسيم روجين ءمينيستردىڭ جۇمىسىن وڭ قارايتىنىن، جۇيەلى جۇمىس جاسالىپ جاتقانىن ايتتى.
«دەپۋتاتتىق ساۋال كەزىندە مەن سۇحبات (ينتەرۆيۋ) بەرۋ ءۇشىن سىرتقا شىعىپ كەتتىم. دەپۋتاتتىق ساۋالدى تىڭداعان جوقپىن. ول تۋرالى كەيىن، جاريالانعان سوڭ عانا ءبىلدىم. جالپى ءمينيستردىڭ جۇمىسىنا وڭ قارايمىن. تۇسىندىرە كەتەيىن: ءمينيستردىڭ بۇل پوزيتسياعا العاشقى كەلگەن كەزىندە دە، ەكىنشى تاعايىندالعان كەزىندە دە بالالارعا ارنالعان كونتەنتتى جالپى مەملەكەتتىك تىلگە كوشىرۋ بويىنشا جۇيەلى جۇمىس باستالدى. مينيسترلىك بالالارعا ارنالعان بەينە جانە باسپا كونتەنتىمەن، باق-تارمەن جۇيەلى تۇردە اينالىسا باستادى. حالىقارالىق Nickelodeon HD, TiJi بالالار ارنالارى ءبىزدىڭ بالالارىمىز ءۇشىن قازاق تىلىندە سويلەي باستادى، بۇل جۇمىس بىرنەشە جىلدان بەرى ايدا بالاەۆانىڭ ۇسىنىسى مەن جەكە باستاماسىمەن جۇزەگە اسىرىلىپ كەلەدى. مەن ءۇشىن بۇل مينيسترلىك جەتەكشىلىك ەتەتىن ماڭىزدى سالالاردىڭ ءبىرى»، - دەدى ماكسيم روجين.
ءبىر نازار اۋدارارلىعى – اتالعان حاتقا قولداپ قول قويدى دەگەن ءماجىلىس دەپۋتاتتارىنىڭ كەيبىرى كەيىن تىزىمنەن الىنىپ تاستالدى. اۋەلگى تىزىمدە ەسىمدەرى كورسەتىلگەن دانيا ەسپاەۆا مەن ماكسيم روجين جانە تاعى باسقا دەپۋتاتتار كەيىن قول قويۋشىلار قاتارىنان تابىلمادى. وسى جاعداي مادەنيەت مينيسترىنە قارسى نەگىزسىز شابۋىل باستالدى ما دەگەن سۇراق تۋعىزادى. دەپۋتاتتار مەن لاۋازىمدى تۇلعالاردىڭ اتىن رۇقساتسىز پايدالانعان ءماجىلىس دەپۋتاتى قازىبەك يسا بۇل ارەكەتى ارقىلى حالىقتى شاتاستىرىپ جاتقانداي كورىنەدى. مۇنداي شاتاستىرۋ دەپۋتاتتىق مانساپتاعى تۇلعاعا سىن ەمەس پە ەكەن؟
