10 qarasha kúni áleýmettik jelide burynǵy ulttyq ekonomıka mınıstri Qýandyq Bıshimbaev túrmeden qashyp ketti degen aqparat tarady. Ishki ister mınıstrliginiń janyndaǵy qylmystyq-atqarý júıesi komıteti bul aqparatty joqqa shyǵardy, dep habarlaıdy «Adyrna» tilshisi.
«Sottalǵan Q. Bıshimbaevtyń qashyp ketkeni týraly jalǵan aqparat taralyp jatyr. Bul aqparat shyndyqqa sáıkes kelmeıdi. Sottalýshy jazasyn qatań tártiptegi mekemede ótep jatyr. Bul jalǵan aqparat taratý faktisi boıynsha qylmystyq is qozǵaldy, kináliler jaýapqa tartylady»,—dedi komıtet ókilderi.
Eks-mınıstr Qýandyq Bıshimbaev 13 mamyrda birneshe aıǵa sozylǵan sottan keıin eki bap boıynsha sottalǵan bolatyn. Oǵan taǵylǵan aıyptar: asa qatygezdikpen kisi óltirý (15 jyldan 20 jylǵa deıin nemese ómir boıyna bas bostandyǵynan aıyrý); qınaý (4 jyldan 7 jylǵa deıin bas bostandyǵyn shekteý nemese osy merzimge bas bostandyǵynan aıyrý). Sot ony 24 jylǵa kesken. Osy qylmysqa qatysy bar Baqytjan Baıjanov qylmystyq kodekstiń 432-baby boıynsha kináli dep tanylǵan. Ol 4 jylǵa bas bostandyǵynan aıyrylǵan.
Eske salaıyq, 2023 jyldyń 9 qarashasynda Astana meıramhanalarynyń birinde qaıǵyly jaǵdaı bolyp, burynǵy ulttyq ekonomıka mınıstri Qýandyq Bıshimbaevtyń áıeli Saltanat Núkenova qaıtys boldy. Sol oqıǵadan keıin Bıshimbaev qamaýǵa alyndy. Artynsha onyń týysy Baqytjan Baıjanov ta qamaldy.
