10 قاراشا كۇنى الەۋمەتتىك جەلىدە بۇرىنعى ۇلتتىق ەكونوميكا ءمينيسترى قۋاندىق بيشىمباەۆ تۇرمەدەن قاشىپ كەتتى دەگەن اقپارات تارادى. ىشكى ىستەر مينيسترلىگىنىڭ جانىنداعى قىلمىستىق-اتقارۋ جۇيەسى كوميتەتى بۇل اقپاراتتى جوققا شىعاردى، دەپ حابارلايدى «ادىرنا» ءتىلشىسى.
«سوتتالعان ق. بيشىمباەۆتىڭ قاشىپ كەتكەنى تۋرالى جالعان اقپارات تارالىپ جاتىر. بۇل اقپارات شىندىققا سايكەس كەلمەيدى. سوتتالۋشى جازاسىن قاتاڭ تارتىپتەگى مەكەمەدە وتەپ جاتىر. بۇل جالعان اقپارات تاراتۋ فاكتىسى بويىنشا قىلمىستىق ءىس قوزعالدى، كىنالىلەر جاۋاپقا تارتىلادى»،—دەدى كوميتەت وكىلدەرى.
ەكس-مينيستر قۋاندىق بيشىمباەۆ 13 مامىردا بىرنەشە ايعا سوزىلعان سوتتان كەيىن ەكى باپ بويىنشا سوتتالعان بولاتىن. وعان تاعىلعان ايىپتار: اسا قاتىگەزدىكپەن كىسى ءولتىرۋ (15 جىلدان 20 جىلعا دەيىن نەمەسە ءومىر بويىنا باس بوستاندىعىنان ايىرۋ); قيناۋ (4 جىلدان 7 جىلعا دەيىن باس بوستاندىعىن شەكتەۋ نەمەسە وسى مەرزىمگە باس بوستاندىعىنان ايىرۋ). سوت ونى 24 جىلعا كەسكەن. وسى قىلمىسقا قاتىسى بار باقىتجان بايجانوۆ قىلمىستىق كودەكستىڭ 432-بابى بويىنشا كىنالى دەپ تانىلعان. ول 4 جىلعا باس بوستاندىعىنان ايىرىلعان.
ەسكە سالايىق، 2023 جىلدىڭ 9 قاراشاسىندا استانا مەيرامحانالارىنىڭ بىرىندە قايعىلى جاعداي بولىپ، بۇرىنعى ۇلتتىق ەكونوميكا ءمينيسترى قۋاندىق بيشىمباەۆتىڭ ايەلى سالتانات نۇكەنوۆا قايتىس بولدى. سول وقيعادان كەيىن بيشىمباەۆ قاماۋعا الىندى. ارتىنشا ونىڭ تۋىسى باقىتجان بايجانوۆ تا قامالدى.
