Foto: Moscow City Court Press Service/ Reuters
2022 jyly Ukrainada Resei äskeri küşterı ūstaǧan AQŞ azamaty Stiven Habbard bosatyldy. Būl turaly Resei prezidentı Vladimir Putin 21 qazanda Sankt-Peterburgte AQŞ prezidentınıŋ arnaiy ökılı Stiven Uitkoffpen kezdesuı kezınde mälımdedı, dep habarlaidy «Adyrna» ūlttyq portaly DW-ge sılteme jasap.
Resei basşysynyŋ aituynşa, 73 jastaǧy Habbard qazır Sankt-Peterburgtegı Pulkovo äuejaiynda jür.
Kezdesu barysynda Stiven Uitkoff Habbardtyŋ bosatylǧany üşın AQŞ prezidentı Donald Tramptyŋ jäne Amerika Qūrama Ştattarynyŋ atynan Putinge alǧys bıldırdı. Onyŋ sözınşe, bırneşe kün būryn ol Habbardtyŋ ūlymen kezdesken. Ol şırkeude dın qyzmetkerı bolyp jūmys ısteidı.
Būǧan deiın Donald Tramp jurnalisterge Resei prezidentınen amerikalyq azamatty bosatudy sūraǧanyn rastaǧan. Sondai-aq ol Habbard mäselesı boiynşa būǧan deiın de küş salynǧanyn aityp, būl ıstı şeşude öz ülesı bar ekenın mälımdegen.
«Maǧan senıŋızder. Būl turaly aitqym kelmeidı. Habbardty bosatu üşın men qyzmetke kelgenge deiın-aq ūzaq uaqyt boiy küş salynǧan. Men basqalar ıstei almaityn närsenı ıstep jürmın», – dedı Tramp.
Stiven Habbard – zeinetker, būryn ärtürlı elderde jūmys ıstegen aǧylşyn tılı mūǧalımı. Ol 2014 jyldan bastap Ukrainanyŋ İzium qalasynda tūrǧan.
Resei tergeuınıŋ mälımetınşe, Ukrainadaǧy tolyq auqymdy soǧys bastalǧannan keiın Habbard tabys tabu maqsatynda qalalyq aumaqtyq qorǧanys batalonyna qosylǧan. Alaida keiın öz ömırıne qauıp töngendıkten, bölımnen ketken.
2022 jylǧy säuırde ony Resei äskeri küşterı ūstaǧan. Al 2024 jylǧy qazanda sot ony jaldamalylyq baby boiynşa alty jyl on aiǧa jalpy rejimdegı koloniiaǧa qamau turaly ükım şyǧarǧan.
Sotta Habbard kınäsın moiyndaǧanymen, keiın aumaqtyq qorǧanys qūramynda nemese basqa da qaruly bölımşelerde eşqaşan qyzmet etpegenın mälımdegen. «Saiasi tūtqyndardy qoldau. Memorial» qūqyq qorǧau jobasynyŋ habarlauynşa, onyŋ äskeri bölımderde qyzmet etkenın rastaityn derekter tabylmaǧan. Ukraina bilıgı de mūndai qyzmettı rastaityn dälelder anyqtamaǧan.
AFP agenttıgınıŋ habarlauynşa, Habbard türmede «ünemı soqqyǧa jyǧylǧan». AQŞ-tyŋ būrynǧy prezidentı Djo Baidennıŋ äkımşılıgı kezınde amerikalyq bilık Resei azamatqa konsuldyq kömek körsetuden bas tartty dep aiyptaǧan.
