Túrkitildes memleketter uıymynyń memleket basshylary keńesiniń otyrysynda sóılegen sózinde Ózbekstan prezıdenti Shavkat Mırzııoev 1967 jylǵy shekaralar negizinde astanasy Shyǵys Ierýsalımde ornalasqan táýelsiz Palestına memleketin qurý Taıaý Shyǵystaǵy qaqtyǵysty sheshýdiń jalǵyz joly ekenin málimdedi, dep habarlaıdy "Adyrna" ulttyq portaly Fergana agenttigine silteme jasap.
Mırzııoev sońǵy aılarda halyqaralyq jaǵdaıdyń aıtarlyqtaı shıeleniskenin atap ótti.
«Bunyń bári eń aldymen Batys Azııada jalǵasyp jatqan ádiletsiz soǵys pen qos standartqa qatysty. Gazadaǵy jáne Lıvandaǵy gýmanıtarlyq apatty beıbit halyqqa, ásirese, balalarǵa, qarttar men áıelderge jasalǵan shabýyldardy eshteńe aqtaı almaıdy. Biz sondaı-aq Palestınadaǵy bosqyndarǵa kómek kórsetý maqsatynda BUU-nyń Batys Azııa agenttiginiń qyzmetin shekteýge baǵyttalǵan áreketterdi qatań aıyptaımyz», – dedi Ózbekstan prezıdenti.
Mırzııoev kelesi aptada Er-Rııadta ótetin arab-musylman memleketteriniń sammıtinde «bul máseleniń syndarly saıası sheshimi tabylady» dep úmittenetinin aıtty.
Palestınalyqtar 1988 jyly qarashada astanasy Shyǵys Ierýsalım bolatyn Palestına memleketiniń qurylǵanyn jarııalady. Sonymen birge KSRO Palestına memleketin resmı túrde moıyndap, 1990 jyly Máskeýde Palestına memleketiniń elshiligi ashyldy. 1992-2000 jyldary Palestınany Qazaqstan, Qyrǵyzstan, Ózbekstan, Ázirbaıjan, Grýzııa jáne birqatar Latyn Amerıkasy elderi moıyndady. 2012 jyldyń qarashasynda BUU Bas Assambleıasy 67/191 qararyn qabyldady, oǵan sáıkes Palestınaǵa BUU janyndaǵy baqylaýshy memleket mártebesi berildi. 2024 jyldyń maýsymyna deıin BUU-ǵa múshe 193 eldiń 146-sy Palestınany memleket retinde moıyndady.
1948-1949 jyldardaǵy arab-ızraıl soǵysynyń nátıjesinde Ierýsalım qalasy Transıordanııaǵa (qazirgi Iordanııa) bólinip, onyń shyǵys bóligi sol eldiń baqylaýyna ótti, al batys bóligi Izraılge ótti. 1967 jylǵy alty kúndik soǵysta Izraıl búkil qalaǵa baqylaý ornatty.
1950 jyldyń qańtarynda Izraıl Ierýsalımdi óziniń astanasy dep jarııalap, onyń batys bóligine memlekettik mekemelerin kóshirdi, al 1980 jyldyń 30 shildesinde Ierýsalımdi óziniń «birtutas jáne bólinbeıtin astanasy» dep atady.
Qalanyń shyǵys bóligindegi Izraıldiń egemendigin BUU nemese halyqaralyq qaýymdastyqtyń kópshiligi resmı túrde moıyndaǵan joq. 2017 jyldyń 6 jeltoqsanynda sol kezdegi prezıdenti Donald Tramp bolǵan Amerıka Qurama Shtattary Ierýsalımdi Izraıldiń astanasy retinde moıyndap, elshiligin Tel-Avıvten osy jerge kóshirdi. Eki aptadan keıin BUU Bas assambleıasy 128 daýystyń kópshiligimen Ierýsalımdi Izraıl astanasy retinde tanýdy aıyptady.
