Qarjy mınıstrligi Memlekettik kirister komıteti tóraǵasynyń orynbasary Seıiljan Ahmetov Qazaqstanda qansha qazaqstandyq ózin bankrot dep jarııalap jáne qandaı somaǵa bankrot bolǵanyn aıtty, dep habarlaıdy “Adyrna” ulttyq portaly.
Búgin Ortalyq kommýnıkaııalar qyzmetinde "Bankrottyq jáne azamattardyń tólem qabilettiligin qalpyna keltirý rásimderin jeńildetý" taqyrybynda baspasóz máslıhaty ótti.
Baspasóz máslıhaty barysynda Qarjy mınıstrligi Memlekettik kirister komıteti tóraǵasynyń orynbasary Seıiljan Ahmetov 2023 jylǵy 3 naýryzdan bastap, ıaǵnı túzetýler kúshine engen ýaqyttan beri sottan tys bankrottyq rásimin qoldaný boıynsha 131 myńnan astam ótinish túskenin habarlady.
"Memlekettik kirister organdarynda 6,6 myń ótinish qaralyp jatyr. 8 myń azamatqa qatysty rásimder júrgizilýde, 2 myńnan astam adamnyń bankorttyq rásimi toqtatyldy. 215 ótinish keri qaıtaryldy. 17,9 myń adam bankrot dep tanyldy, qaryz somasy 40 mlrd teńge", - dedi spıker.
Onyń sózinshe, ótinishter sany boıynsha Almaty qalasy, sondaı-aq Almaty, Jambyl jáne Túrkistan oblystary kósh bastap tur.
Bul rette sot 45 adamdy bankrot dep tanyp, 13,6 mlrd teńge qaryz keirildi.
"Jaqynda biz bankrottyq týraly ótinishterdi qaradyq, er adam – 53 paıyz, al áıelder 47 paıyz boldy. Orta eseppen ótinish berýshilerdiń basym bóligi 40-42 jas aralyǵyndaǵy turǵyndar. Qaryzdyń ortasha mólsheri birneshe myń teńgeden 2 mıllıard teńgege deıin, - dep túıindedi sózin Seıiljan Ahmetov.
Qarjy mınıstrligi Memlekettik kirister komıtetindegi basqarma basshysy Merýert Sısembaeva "Erli-zaıyptylardyń birin bankrot dep taný olardyń nesıe alý múmkindigine áser ete me?" degen suraqqa jaýap berdi.
"Jalpy, ıpoteka maquldana ma, joq pa ony bank ókilderi sheshedi. Zań boıynsha "bankrot" dep tanylsa, onda 5 jyl boıyna nesıe berilmeıdi, - dedi ol.
Eske salaıyq, 2023 jyldyń 3 naýryzynda Qazaqstanda qaryzy bar azamattarǵa ózin bankrot dep jarııalaýǵa múmkindik beretin zań kúshine endi. 2024 jyly bankrottyq rásimi boıynsha birqatar talaptardy alyp tastaý arqyly aıtarlyqtaı jeńildetildi.
