Kitap oqýdyń hıkmeti men qyzyǵy jaıynda oı bólisken mádenıet salasynyń belsendisi qarapaıym áreketter kishkentaı qadamdardan bastalady deıdi.
Qazaqstandy kitap oqıtyn elge aınaldyrý mıssııasynyń aıasynda týyndaǵan Kitapal club, Kitapal podcast, Aýylǵa Kitapal jobalarynyń jetekshisi Danııar Jigitbek atqarylǵan jumystarymen bólisip, aldaǵy josparlaryn tanystyrdy.
- «Qazaqstandy kitap oqıtyn elge aınaldyrý» mıssııańyzdy oıdaǵydaı júzege asyryp jatyrsyz ba?
- Qazaqstandy kitap oqıtyn elge aınaldyrý mıssııamyz oıdaǵydaı júzege asyp jatyr dep aıta alamyn. Oǵan dálel – kúnde bizge kelip jatqan hattar. «Sizderdiń jobalaryńyz arqyly qyzyǵýshylyǵym artyp, kitap oqı bastadym», «mektebimizde, ortamyzda osyndaı kitap oqý sharalaryn jasadyq» degen sııaqty hattar kelip jatyr.
Bul bizdiń eńbegimizdiń kishkentaı jemisi dep oılaımyn. Biz istemegende mundaı nárseler bolmas pa edi degen oı keledi. Mıssııamyz júzege asyp jatyr, osylaı jalǵasa beredi degen úmitimiz bar.
- Aýylǵa kitap jetkizetin jobańyzda qandaı jańalyqtar bar? Nátıjelermen bólisseńiz.
- Aýylǵa Kitapal jobasy aıasynda 400-ge jýyq kitap jetkizdik. Bıylǵy maqsatymyzǵa jettik. Buıyrsa, kelesi meje – 1000 aýyl. Bizdiń eriktilerimiz de, qoldaýshylarymyz da kóbeıip jatyr. Sol úshin bul joba jalǵasyn tabady dep senemiz.
- Jaqynda Kitapal club oqyrmandar klýbymen úlken jıyn ótkizgeli jatyr ekensizder. Qandaı nátıje kútesiz?
- Qarashanyń 2-si kúni Kitapal club Qazaqstandaǵy eń úlken oqyrmandar qaýymdastyǵynyń bir jyldyǵyn Astana qalasynda ótkizgeli jatyrmyz. Bul da bir úlken nátıje. Oqyrmandarymyzdyń sany men sapasynyń artqanyn kútemiz. Bul keshte tek Kitapalclub-tyń músheleri ǵana emes, syrttan da keletin qonaqtar bolady. Sol úshin bul jaqsylyqty jaıý jobasy desek te bolady.
- Osy kúnge deıin jastar kitap oqymaıdy, qazaq tildi kitaptar oqıtyndar az degen sózderdi jıi estip keldik. Qalaı oılaısyz, elimizde kitap oqý mádenıeti qalyptasty ma?
- Elimizde kitap oqý mádenıeti qalyptasyp kele jatyr dep oılaımyn. Bizdiń jastyq shaqpen qazirgi jastardy salystyrsaq, qazir kitap oqıtyndar kóbirek dep aıta alamyn. Biz durys baǵytta damyp kele jatyrmyz.
- Qatelespesem, ár nárseni úıretetin kitaptar jazylsa dep edińiz. Kitapty kez kelgen adam jazatyn bolsa, qunyn joǵaltady dep oılamaısyz ba?
- Kitapty kez kelgen adam jazady degendi meńzemedim. Biz ár salanyń mamany óz salasy boıynsha kitap jazǵanyn qoldaımyz, qalaımyz jáne soǵan shaqyramyz. Bizdiń baǵytymyz sondaı. Ár adam, ár maman óz salasy boıynsha kitap jazsa bizde kitap qory da, bilim qory da kóbeıetin edi. Jaqsylyq ákelmese, onyń eshqandaı jamandyǵy joq.
- Kitap oqý mádenıetin arttyrý úshin úshin mektepte, ýnıversıtette reforma jasaý kerek dep oılaısyz ba?
- Kitap oqýdy arttyrý úshin úlken reforma jasaýdyń qajeti joq dep oılaımyn. Tek kishkentaı qadamdar men sheshimder qossa jetkilikti bolar edi. Ol qandaı deseńiz, ár sabaqtyń basynda on mınýt kitap oqý degen erejeni bekitse, jemisin mindetti túrde kóremiz.
- Elimizdegi kitaphanalardy jandandyryp, jastardyń qyzyǵýshylyǵyn týdyrý úshin ne isteý kerek dep oılaısyz?
- Kitaphanalardy jandandyrý máselesi boıynsha zamanaýı kitaptar qoryn jasaqtaý kerek. Sosyn sol kitaptardy oqyp, taldaıtyn oqyrman klýbtardy kóptep ashý qajet. Klýbtardy túrli táttimen, shaımen bas qosýǵa qyzyqtyryp, yntalandyrsa degen usynysym bar.
- Jaqynda «Ne úshin úılený kerek?» kitabyńyz qyrǵyz tiline aýdaryldy. Bul qalaı júzege asty?
- Iá, jaqynda aýdarylyp, 2000 dana bolyp basyldy. Qyrǵyz baspasynyń biri aýdarsaq bola ma degen ótinish jasady. Sóıtip kelisim-shart jasasyp, kitapty aýdardy. Basyp shyǵaryp, taratyp jatyr. Qyrǵyz oqyrmandar jaqsy baǵa berip jatyr. Meniń kitaptarymnyń paıdasy kóp adamǵa tıip jatqanyna qýanyshtymyn.
- Suhbattasqanyńyzǵa raqmet!
Mereı Myrzaǵalıqyzy
«Adyrna» ulttyq portaly
