Florıdaǵa soqqan «Mılton» daýylynan qaza tapqandar sany 15 adamǵa jetti, dep habarlaıdy «Adyrna» ulttyq portaly.
Daýyl qurbandaryn izdeý áli de jalǵasýda. Zardap shekken aımaqtardan kelgen aqparat boıynsha qurbandar sany ósýi múmkin.
Daýyl kezinde 340 adam men 49 úı janýary qutqaryldy. AQSh ishki qaýipsizdik mınıstri Alehandro Maıorkastyń aıtýynsha, Florıda turǵyndaryna jer ýchaskelerin tartyp alady degen jalǵan aqparattar taralyp úreı týǵyzǵan. Sondyqtan keıbir turǵyndar qutqarýshylardyń kómeginen bas tartýda.
«Mılton» bastapqyda 3-sanattaǵy daýyl bolyp, Florıdanyń Sarasota okrýgine jetkende álsirep, 1-sanattaǵy daýylǵa aınaldy. Fitch Ratings agenttigi daýyldyń múlikke keltirgen shyǵynyn 30-50 mıllıard dollar dep baǵalady.
